Errenteriako liburutegiak eta kultura sailak aurrez aurreko zerbitzuari berrekingo diote
Liburutegian maileguak egin ahalko dira eta Errenteriako Udalaren Kultura Sailak arreta eskainiko du aldez aurretik hitzordua eskatuta.
Liburutegian maileguak egin ahalko dira soilik, bestelako zerbitzurik ez da eskainiko. Ekainaren 1etik (astelehena) aurrera, aurrez aurreko hainbat zerbitzu ematen hasiko da berriz ere Errenteriako Udala. Liburutegian maileguak egin ahalko dira, eta kultura sailak aurrez aurreko arreta emango die aldez aurretik hitzordua eskatu duten herritarrei. Liburutegia astelehenetik ostiralera, 10:00etatik 18:30etara izango da irekita.
Sarrera baino ez dute irekiko eta maileguez gain, ez da bestelako zerbitzurik eskainiko. Haurren liburutegiak itxita jarraituko du eta bertako edukiak, helduen liburutegiaren eraikinean jaso beharko dira. Beharrezko ez izan arren, mailegua egitera joan aurretik, haiekin harremanetan jartzea gomendatu dute liburutegiko arduradunek nahi den liburua eskatzeko. Horretarako hiru aukera eman ditu Errenteriako Udalak; posta elektronikoa, Whatsapp-a 647 673 451 zenbakira idatziz ala besterik gabe telefonoz, 943 449 635 zenbakira deituz.
Era berean, Euskadiko Liburutegien Katalogoan ere maileguak egin daitezkeela oroitarazi dute. Liburua itzultzerakoan eraikinean sartu behar ez izateko, nahi duenak sarrerako buzoian utzi ahalko du.
Errenteriako Udalaren Kultura sailak ere ateak irekiko ditu 9:00etatik 14:00etara. Herritarrak bertaratu ahalko dira, baina soilik aldez aurretik hitzordua duten herritarrei. Hitzordua posta elektronikoz eskatu daiteke, edo 943 449 634 telefonora deituz.
Udal zerbitzuen edozein eraikinean sartu aurretik, eskuak garbitzea eta maskara eramatea beharrezkoa izango da. Aipatutako zerbitzuez gain, astelehenetik aurrera administrazio epeak ere berriro abian izango dira.
