Arditurriko parketxea berriro irekiko dute, ekitaldi sorta batekin
Bihar irekiko dute interpretazio zentroa, eta astebururako plan pare prestatu dute. Larunbatean orientazio jolasa egingo dute, eta igandean, mendi ibilaldia.
Orientazio jolasa egingo dute larunbatero. Ia hiru hilabetez itxita egon ondoren, Arditurriko interpretazio zentroa bihar —asteazkena, hilak 3— irekiko dute. Horrez gain, ekaineko asteburutarako planak antolatu dituzte.
Larunbatero Iparra galdu gabe orientazio jolasa eskainiko dute, familien gozagarri. Parketxetik abiatuko dira, eta inguruan barreiatuko dira. 10:00etatik 12:00etara eskainiko dute, eta txandak hogei minutuero izango dira. Pertsonako prezioa hiru eurokoa izango da. Familia ugarien kasuan, kide batek ez du ordain beharko.
Igandean, Oialekura
Datorren igandean, berriz, mendi ibilaldi gidatua egingo dute, Oieleku mairu-baratzeen bila izenburupean. Lau kilometroko ibilbidea egingo dute, Kausoko aparkalekutik abiatuta. Megalitoak eta paisaia kulturalak ikusiko dituzte, eta natura interpretatzeko geldialdiak egingo dituzte.
10:00etan irtengo dira, eta 12:30ean bukatuko da, Kauson bertan. Ibilaldia euskaraz izango da, eta prezioa bost eurokoa izango da. 3 eta 12 urte bitartekoek hiru euro ordaindu beharko dituzte. Hamaiketakoa jateko tartea hartuko dutela ziurtatu dute.
Ez dira ekaineko jarduera bakarrak izango. Hilaren 21ean, Mineralen bila ibilaldi gidatua egingo dute, parketxearen inguruan bertan. Helburua meatzaritzak utzitako aztarnak ikustea izango da, baita mineralak aurkitzea ere. Kasu horretan ere bai, 10:00etan hasiko da txangoa, eta prezioa lau eurokoa —haurrek bi— izango da.
meategira bisitak ez dituzte egingo, itxita jarraituko dutelako. Egingo dituzten jarduera horietan prebentzio neurriak hartuko dituzte: talde txikietan mugituko dira, eskuak gel hidroalkoholikoarekin garbituko dituzte eta musukoa eramatea eskatu dute.
Erreserbak egiteko edo informazio gehiago eskatzeko 943 49 50 69 edo 688 89 50 68 telefono zenbakietara dei daiteke, edo e-posta bidez idatzi.
