Lander Garrok intsumisioaren gaineko dokumentala eramango du pantaila handira
Bi urte, lau hilabete eta egun bat hori Lander Garro idazle, argazkilari eta dokumental zuzendari errenteriarraren azken lana.
Argazkia: E. Rodriguez Bi urte, lau hilabete eta egun bat hori Lander Garro idazle, argazkilari eta dokumental zuzendari errenteriarraren azken lana. Intsumisioaz mintzo da Garro, 1990. hamarkadan gizartea astindu zuen mugimendu erraldoi eta eredugarriaren gainean dokumentala egin eta esanahiz beteriko izenburua aukeratu, gainera: Bi urte, lau hilabete eta egun bat izan zen hamarnaka intsumisoek jaso zuten zigorra, espetxearekin ordaindu zutena.
Bi urte, lau hilabete eta egun bat dokumentalaren kartela.
Garrok, pantaila handian estreinatuko du lehenengoz bere lan bat, aurretik beste hiru dokumental ditu eginak errenteriarrak. Hilaren 24an egingo du aurrestreinaldia Garrok, Donostiako Antzoki Zaharrean ( Alde Zaharreko Kale Nagusian”. Lana luzea eta gogorra izan dela aitortu du, “aldika kitzikagarria eta besteetan hunkigarria, noizbehinka desesperagarria, eta besteetan haluzinagarria”. Abentura berri horretan lagun edo bidaide izan dituen guztiak dokumentalaren aurkezpen kartelean bildu ditu Garrok, baina aipamen berezia egin dio Zigor Garro anai bikiari, “bereziki pozten nau hilotan bidaide izan dudan Zigor Garro aipatzea, hark lagundu bainau dokumentala editatzen; nire konplizea, nire iturria, eta batez ere, nire anai bikia”.
1990. hamarkadako derrigorrezko zerbitzu militarraren kontrako mugimenduaren azterketa bat egin du dokumentalean: politikoa, soziala eta intimoa. Haren esentzia eta indarra, izan zena gogorarazteko, zer izan zen eta egun zer den eta horretarako intsumisioa bete-betean ezagutu zutenen testigantza ez ezik, bazterrekoena ere jaso du.
Estreinaldirako sarrerak salgai dira 4,50 euroan. Hilaren 24an, asteazkenarekin, 19:00etan izango da dokumentalaren emanaldia.
