Merkatari, ostalari eta zerbitzuentzako laguntzak onartu dituzte
Ez ohiko plenoa egin dute, puntu bakarrarekin. Udalak —oraingoz— 150.000 euro bideratuko dute txikizkako establezimenduak laguntzera.
Oiartzungo udalbatza atzo eguerdian bildu zen, ez ohiko plenoan. Puntu bakarra izan zuten mahai gainean: merkataritza, ostalaritza eta zerbitzu establezimenduei bideratu beharreko laguntza ekonomikoa. COVID-19aren ondorioz itxita egon behar izan duten establezimenduentzako dira.
Udalak hainbat kontzeptu lagunduko ditu diruz: errenta, aholkularitza, berriz irekitzeko egin beharreko moldaketen gastuak, aseguruak, udaberri/udako salgaien gastuak… Oraingoz 150.000 euro bideratuko dituzte horretara. Kopuru hori handitu daitekeela iragarri zuen Jexux Leonet alkateak.
Establezimendu txikientzako diru laguntza aho batez onartu zuten. Gipuzkoako Aldizkari Ofizialean argitaratzen denetik, 15 egun izango dituzte eskaerak egiteko Oiartzungo merkataritza, ostalaritza eta zerbitzu establezimenduek.
Diru laguntza hori bonuen kanpainarenari batuko zaio. COVID-19aren eragina ahal bezain beste arintzen saiatuko da udala.
Atzo egin zuten plenoa hirugarrena da pandemia hasi zenetik. Hirurak publikorik gabe egin dira.
