Oarsoaldeko AEKren euskaltegiak, udan zabalik
Oarsoaldeko AEKren euskaltegiak, udan zabalik izango dira. Ikastaro trinkoak antolatu dituzte uztaila eta iraila artean, Segurtasun neurriak ezarri dituzte.
Lezoko Oroitzeneko Edurne Lizarazu eta Antxoko Txirritako Raul Perez irakasleak, udako ikastaroak aurkezten. Udan, praka motzak, eguzkitarako betaurrekoak, eta euskaltegira. Oarsoaldeko AEK-k jakinarazi du udan zabalik izango dituztela ikasgelak, udarako ikastaroak antolatu ditu. Trinkoak izango dira. Eskolak osasun segurtasun araudiari jarraiki egingo dituzte. Egoera berrira egokitu dituzte euskaltegiak.
Uztailetik irailera autoikaskuntza zerbitzua emango dute eskualdeko AEKren euskaltegiek, 267 euroko matrikulazio kostuarekin. B1, B2 eta C1 titulazioak prestatzeko eskolak, berriz, irailean egingo dituzte, egunean lau orduz, goizez eta arratsaldez (matrikularen prezioa 143 eurokoa da).
Horietan izena emateko epea ezarri du AEK-k: uztailaren 8a da horretarako azken eguna. Izen-ematea Lezoko Oroitzenen, Oiartzungo Intxixun, Oreretako Xenpelarren eta Antxoko Txirritan egin daiteke.
2019-2020 ikasturtean 500dik gora ikasle izan dituzte Oarsoaldeko AEKren lau euskaltegiek. Martxora arte aurrez aurreko eskoletan izan dira euskara ikasleak, alarma egoera indarrean jarri zenetik online aritu dira ikasle eta irakasleak.
