Pintaketa egin dute Kalparran, Ondartxo pasealekua irekitzea eskatuz
Mezua lurrean idatzi dute, Sanpedrotarra Arraun Elkartearen instalazioen ondoan. Oraingoz inork ez du bere gain hartu ekintzaren ardura.
Asteak dira Ondartxo pasealekua itxi zutela. Irudia: Iñigo Barrenetxea.
Pintaketa egin dute San Pedron, Kalparra inguruan Ondartxo pasealekua irekitzea eskatuz. Puntaseko bidea ireki esaldia ageri da lurrean Sanpedrotarra Arraun Elkartearen instalazioen alboan, pasealekua eteten duen hesitik metro eskasera. Argitu gabe dauden arrazoiengatik, mezua gorriz eta horiz idatzita dago. Argazkia gaur goizekoa da; Iñigo Barrenetxea Berasategik helarazi dio HITZAri. Oraingoz ez dago gainontzeko informaziorik ekintzaren inguruan, inork ez baitu bere gain hartu ardura.
Itxiera hainbeste luzatu izanak, baina, ezinegona eragin du herritar askoren artean. Asteak dira Ondartxoko pasealekua itxita dagoela, luizi batzuen ondorioz. Segurtasuna bermatuta ez dagoelakoan, sarbidea itxita mantentzen du Pasaiako Portu Agintaritzak, harena baita pasealekuarekiko eskuduntza.
Portuak berak Ondartxoko pasealekua irekitzeko nahia agertu zuen maiatzaren 8an. Mendiaren magala portuaren eskumenetatik at dagoenez, Pasaiako Udalari magaleko jabeekin harremanetan jartzea eskatu zioten, neurriak har ditzaten.
