Zerbitzu publikoen eta aberastasuna banatzearen alde mobilizatuko dira
Eskubide Sozialen Kartak mobilizazio eguna antolatu du ostiralerako. Oiartzunen arratsaldean egingo dute, lau zutabetan.
Euskal Herriko Eskubide Sozialen Kartak beste mobilizazio egun bat deitu du. Irudian, urtarrilaren 30eko greba. COVID-19aren etorrerak agerian utzi ditu zerbitzu publikoen ezinbestekotasuna. Horien defentsan —baita beste hainbat arrazoirengatik ere—, Euskal Herriko Eskubide Sozialen Kartak mobilizazio eguna deitu du datorren ostiralerako —hilak 19—. Leloa Publikoa, funtsezkoa zaindu aberastasuna banatuz izango da.
Oiartzunen arratsaldean mobilizatuko dira, 18:30etik aurrera. Done Eztebe plazan elkartuko dira, eta lau zutabe osatuko dituzte: gazteena; emakumeena; pentsionistena; eta gainontzeko langileena.
Zarata egiteko tresnak eramateko eskatu dute. Horrez gain, musukoak ez ahazteko gogorarazi diete mobilizazioan parte hartu nahi dutenei.
Aldarrikapenak
- 1- Zerbitzu publikoak garatu. Zaintza lanen (zahar egoitza, eguneko zentro, aniztasun funtzionala duten pertsonentzat egoitza-elkate, adin-txikikoen bizileku eta etxez etxeko zerbitzuak), osasungintza publikorako lanean ari diren zerbitzuen, administrazio publikoek (hezkuntza publikoa, osasungintza…) azpikontrataturiko zerbitzuen (garbiketako, hezkuntzako monitoreak, jantokietako langile-hezitzaileak…) eta anbulantzia zerbitzuen berehalako publifikazioa langile guztien subrogazioa eta finkatzeko salbuespenezko prozedura bat bermatuz. Esparru hauetatako lan baldintzak langile publikoaren lan baldintzekin parekatzea.
- 2- Zaintza eredua aldatu eta jaiotzatik heriotzara zaintza bermatuko duen kalitatezko zaintza sistema publiko, unibertsal eta doakoa bermatzeko administrazioek 10.000 lanpostu sortzea.
- 3- Pobrezia eta bazterketa sozialaren kontrako HELean planteaturiko neurriak: DSBEa eta EBa gutxieneko soldataren %100a eta etxebizitza eskubidea.
- 4- 1080 eurotako gutxieneko dirusarrera erretiroa hartua duten pertsonentzat.
- 5- 1200 euroko gutxieneko soldata/35 orduko gehienezko lanaldia.
- 6- Fiskalitate berria: Proposamen honek suposatzen duen gastu igoera guztia eta testuinguru honetan sortuko den zor publiko guztia errenta altu, kapital-errenta eta enpresen irabazien gaineko zergen kontura izatea.
- 7- Administrazio-egoera irregularrean eta ezkutuko ekonomian lanean ari diren pertsona guztien erregularizazioa.
