OTXEk mendi bizikleta eskolak eskainiko ditu udan
OTXE Bike Eskola egingo dute ekaina bukaera eta abuztu bukaeraren artean. Segurtasun neurriak hartuko dituztela ziurtatu dute, erabakia hausnartuta.
COVID-19ak sortutako egoerak hausnarketara bultzatu zuen OTXE, eta erabakia hatu dute: uda honetan OTXE Bike Eskola eskainiko dute. Osasun neurriak zorrotz beteta, mendi bizikleta ikastaroak eskainiko dituzte ekainaren 22tik abuztuaren 28ra.
11 eta 18 urte arteko neska-mutilei, zein 18 urtetik gorakoei zuzenduta dago. Astero bi talde hartuko dituzte, bat goizez eta beste bat arratsaldean —txanda aukeratu dezakete—. Segurtasuna bermatze aldera, taldeak gehienez hamar pertsonakoak izango dira.
Mendi bizikleta campusa Oiartzunen egingo dute, Oarsoaldean mendi bizikletan ibiltzeko toki onena dela ziurtatu baitute. Helburua udako aste ahaztezin bat pasatzea dela esan dute, “begirale onenekin”.
Gaztetxoentzako prezioa 50 eurokoa izango da, eta helduentzakoa, berriz, 150 eurokoa. Izena eman nahi dutenek edo informazio gehiagoren beharra dutenek OTXEren e-posta helbidera idatz dezakete.
