Madalensoro eta Elorsoro berriro ateak irekitzeko prestatzen ari dira
Kiroldegiak ahalik eta eskaintza zabalena eskaini nahi du, eta udako ikastaroak emango dituzte. Madalensoro erabiltzeko erreserba egin beharko da.
Eremu termoludikoa da irekiko duten guneetako bat.
Uztailaren 1ean irekiko dituzte, hainbat hilabeteren ondoren, Madalensoro pilotalekua eta Elorsoro kiroldegia. Kirol instalazioak itxita egon dira, COVID-19aren ondorioz.
Elorsoroko arduradunek adierazi dutenez, prestaketa lanak egiten ari dira, eskaintza ahalik eta zabalena izan dadin. Honako guneak erabiltzeko aukera egongo dela jakinarazi dute: igerilekua; eremu termoludikoa; solariuma; padela; gihartze eta kardio gelak; rokodromoa; squasha aretoa; fisioterapia; aldagelak eta dutxak. Horrez gain, udako ikastaroak eskainiko dituztela jakinarazi dute.
Horiek guztiak modu seguruan eskaini ahal izateko, hainbat neurri hartu dituzte. Jarduerak espazio zabalagoetara eramango dituzte, hartara distantzia mantendu ahal izateko. Gainera, kiroldegiko ibilbideak berriro diseinatu dituzte eta higiene eta osasun protokolo zehatza ezarriko dute.
Madalensoro pilotalekuari dagokionez, aldez aurretik erreserba egin beharko da. Horretarako, 943 49 25 52 telefono zenbakira deitu beharko da. Gainontzekoan, pandemia iritsi baino lehenagoko baldintzak izango ditu.
