Gauez gertatu diren jende pilaketek kezka sortu dute udalean
Jende pilaketak saihesteko, erakundeak arduraz jokatzea eskatu die herritarrei. Norberaren erantzukizunari deia egin dio udalak.
Jende pilaketak saihetsi behar direla nabarmendu du udalak. Irudian, 2018ko txupinazoa.
Oiartzungo Udalak oharra plazaratu du, herritarrei arduraz jokatzeko eskatuz. Beste behin gogorarazi dutenez, erakundea neurriak hartzen ari da COVID-19a ez hedatzeko.
“Oraindik, ordea, birusaren hedapena ekiditeko lanean jarraitu behar dugu eta gaixotasuna kontrolatu beharra dago. Horretarako, jende pilaketak ekiditea ezinbestekoa da”, adierazi dute. Horretan lanean ari direla gaineratu dute; Uda Kulturaleko ekitaldiak prestatzen ari dira, eta horietan jende pilaketak saihesteko neurriak diseinatzen dabiltza. “Aurtengo udan hori izango da erronka nagusietako bat”, zehaztu dute.
Hala ere, antolatutako ekitaldirik ez dagoenean, ardura norberarena dela nabarmendu dute. Gauez egon diren jende pilaketak kezkatzen ditu udalak. “Dagoeneko neurriz kanpoko gertaerak egon dira, eta udan ezer larririk ez gertatzeko, herritar guztiek arduraz jokatu beharko dugula gogorarazi behar dugu”.
