Larrialdi zaintza zerbitzua azalduko diete gurasoei, astelehenean
Udalekuen ordezko zerbitzuaren berri emango dute. Haurren ikasketa-mailen araberako bilerak izango dira, modu ordenatuan egiteko.
Uztaileko udalekuak ez dira orain arte bezalakoak izango, eta horren ordez Oiartzungo Udalak larrialdi zaintza zerbitzua eskainiko du. Kontziliazio arazoak dituzten familiei zuzendutakoak izango dira, izena eman zuten haur guztiei ezingo baitiete zerbitzua eskaini. Eusko Jaurlaritzak 200 haurreko kopurura mugatu ditu —udalekuetan 400ek eman zuten izena—.
Segurtasun neurri guztiak betez egingo dituzte aurkezpen bilerak, datorren astelehenean. Jende pilaketak saihesteko, ordutegi ezberdinetan izango dira hitzorduak, haurren mailaren arabera: HH3, HH4 eta LH6ko gurasoentzako bilera 16:30ean; HH5 eta LH3ko gurasoentzat, 17:15ean; LH1 eta LH5ekoentzat, 18:00etan eta, LH2 eta LH4koentzat, 18:45ean. Bilerak udaletxeko areto nagusian izango dira.
Seme-alaba bat baino gehiago dituzten gurasoei seme-alaba gazteenak bukatu duen mailako bilerara joatea eskatu dute.
