San Joan bezperako ospakizunik ez Herriko Plazan
Zuzeneko dantza ikuskizunik ez, baina hilaren 23an Iraultza Dantza Taldearen sare sozialetan, Facebook, Twitter eta Instagramen iazko kantaiaren bideoa zintzilikatuko dute. Halaber, Ereintzak Soka Dantza sinbolikoa irudikatuz egindako bideoa Herri Bizian ikusteko aukera izango da.
Iazko Urdiaingo Kantaiaren irudi bat. Argazkia: Iraultza Dantza Taldea Beharrezkoak diren segurtasun eta distantzia neurriak bermatzea ezinezkoa denez, bertan behera utzi ditu udalak aurten San Joan bezperako ospakizunak Herriko Plazan. Hala, Errenteria Musikaleko ikasleen aurreskua, Ereintzako txistulariekin kalejira, soka dantza eta San Joan sua, bertan behera utzi dituzte.
Urdiaingo erritorik ere ez
Aurtengoa urte berezia zen Iraultza dantza taldearentzat, Urdiaingo Kantaia Errenteria-Oreretako Herriko Plazan egiten hasi zirenetik 25 urte betetzen zirelako. Ez direla beharrezko osasun eta segurtasun neurriak bermatzeko baldintzak ematen iritzita behartutako erabakia da Iraultzarena ere.
Zuzeneko dantza ikuskizunik ez, baina teknologia berriek lagunduta, hilaren 23an Iraultza Dantza Taldearen sare sozialetan, Facebook, Twitter eta Instagramen iazko kantaiaren bideoa eta aurreko urteetako argazkiak zintzilikatuko dituzte: “Pantailaren bestaldean bada ere, San Joan bezperako gau magikoan uzta eta urte ona izan dezagun kantaia egin eta konjurua botako du Iraultza Dantza Taldeak. 2021 urtean ekainaren 23an 22:00etan Errenteriako Herriko Plazan zuen zain izango gara”.
Ereintzaren soka dantza Herri Bizian
Ereintza Dantza taldeak Soka Dantza sinbolikoki irudikatzeko sortu duen bideoa ereik usteko aukera izango da, Herri Bizian, zehazki. Esteka eta gainerako xehetasunak datorren astean jakinaraziko dituzte.
