Lezon, San Joan bezperako surik ez, baina soka dantza bai
Lezon, San Joan bezperako surik ez, baina soka dantza bai. Soka dantza plazan egingo dute, eta gehienez 106 ikusle izateko prestatuko dute.
San Joan bezperako sua Lezoko plazan, artxiboko irudian. Lezoko Udalak, alkatearen dekretu bidez, erabaki du biharko San Joan bezperako suak ezin izango direla egin. Bai egingo da, ordea, Gurutze Santuaren plazan soka dantza, 22:00etan hasita. Baina baldintza askorekin egingo da, betiere koronabirusaren gaineko segurtasun neurriak errespetatuz.
Batetik, herritarrei eskatu diete surik ez pizteko kalean, eta horien ordez, 22:00etan botako duten suziria entzutean balkoira hurbildu eta kandela edo argitxoa pizteko. Orduan hasiko dira soka dantzarekin plazan.
Soka dantzan, Jesus Mari Martiarena alkatearen dekretuaren arabera, “dantzari helduak” egongo dira, hesituta egongo den Gurutze Santuaren plazan (21:00etan hasiko dira plaza ixten). Plazak dituen bost sarbideak itxiko dira: Zubitxo kalekoa, Kale Nagusikoa, Donibane kalekoa, eta Goiki plazatik jaisten diren bi eskailerak. Sarbideetan boluntarioak egongo dira, horiek itxita daudela ziurtatzeko. Ikusleak izan ditzake ekitaldiak, baina adi: plazaren edukiera 106 pertsonakoa izango da, eta aulkiak metro eta erdiko distantziarekin jarriko dituzte, espazio eszenikoaren perimetroa errespetatuz.
Plazako ikuskizunera joango diren 106 ikusleen sarrera Kale Nagusitik egingo da, eta sartzerakoan, gel hidroalkoholikoa erabili beharko dute; plazara ezin da sartu maskararik gabe. Behin plaza barruan, eta ezbeharrik ez bada, ezin da bertatik atera. Plazatik banan-banan atera beharko dute ikusleek ikuskizuna bukatzean, eta kasu honetan hiru irteera egongo dira.
Ikuskizunean publiko bezala egoteko sarrera modukoa (doan da) edo gonbidapena beharko da. Hori Lezoko Udalaren webgunearen bitartez eskura daiteke; pertsona bakoitzak bi sarrera hartu ahal izango ditu gehienez.
Soka dantzan izango diren dantzari eta musikarien artean ere segurtasun neurriak beteko dituzte.
