Zinegoak-en filmak online ikus ahal izango dira asteburuan
Martxoan eskaintzekoak ziren zazpi filmak ostiraletik igandera bitartean ikusi ahal izango dira, sexu askapenaren egunaren harira. Internet bidez erregistratu beharko dira.
Martxoaren 13an Zinegoak Bilboko Gaylesbitrans Nazioarteko Jaialdian erakutsitako zazpi filmen emanaldia zegoen programatuta. COVID-19a dela eta, bertan behera utzi behar izan zuten ekitaldia.
Udalaren Feminismo Sailak tiraderan gordetako film haiek berreskuratu eta asteburu honetan emango dituzte. Hori bai, online izango da. Jatorrizko bertsioetan emango dituzte ondorengo film hauek, azpitituluekin: Cocodrilo, Adlib, My world in yours, Jess, Estimada Señora directora, Rani eta Bodies like oceans.
Film horiek ikusteko, erregistratu egin beharko da, esteka honetan. Kode bat jasoko du bertan, eta asteburuan —ostiraletik igandera bitartean— erabili ahal izango du, nahi duen orduan ikusteko.
Datorren igandea, gainera, Ekainak 28 da, Sexu Askapenerako Nazioarteko Eguna. Oiartzungo Udalak oiartzuarrak animatu ditu, LGTBI gaiak jorratzen dituzten film horiek ikustera, “sexu aniztasunarekiko errespetua gizarte justu batentzako oinarrizkoa” delako.
