San Joan bezperaren magiak, ez du hutsik egingo gaur
Gaztañoko jai batzordeak gaur 23:00etan, balkoietan kandelak pizteko eskatu die auzotarrei, su garbitzailea, eta sorgin gau magikoa irudikatzeko.
halako irudirik ez da izango gaur gauez. Gau berezia da San Joan bezpera. Ura, sua eta sendabelarrak ditu protagonista udako solstizioaren hasiera ospatzen duen jaiak. Gau magikoa da zalantzarik gabe, baina aurten ezingo da ohiko moduan ospatu.
Ohiko ospakizunik ez, baina herriko dantzariek ez dute hutsik egin nahi izan, eta zuzenean izango ez bada ere, soka dantzaren emanaldi berezia atondu du Ereintza Dantza taldeak eta bideoa osatu, online gozatzeko. Hainbat udal ordezkari lagun dituztela, dantzari eta txistulariak San Joan bezpera ospatzeko aukera eskainiko diete herritarrei bideoaren bidez.
Horren ondoren, dantza gehiago; Iraultza Dantza taldearen iazko Urdiaingo Kantaiaren bideoa ikusteko aukera izango da.
Hori guztia, Herri Biziaren esteka honetan ikusi ahalko da 20:00etan hasita.
Gaztañon kandelak
Gaztañon jaiak eta Sorgin Gaua, gaurko egunarekin handiki ospatzen dutena, bertan behera uztea erabaki zuten osasun larrialdiarengatik. Hala ere, orain arteko beste ospakizunekin egin duten moduan, etxeko leiho eta balkoietan ospatzeko deia zabaldu diete jai batzordeko kideek auzotarrei. Hala, gaur 23:00etan, balkoietan kandelak pizteko eskatu diete, su garbitzailea, eta sorgin gau magikoa irudikatzeko.
San Joan bezperarekin lotutako sinismen ugari dago. Horietako bat da hau: gauerdian, 00:00ak jotzen duten une berean, errekako ura ardo eta harriak ogi bihurtzen omen dira. Une horretan erreka bazterrean egonez gero, bizitza osorako zoriontasuna lor omen dezake.
