Estropadak ezingo dira aurreikusitako eremuan jokatu
Udaltzaingoak egindako txosten baten arabera, hasiera batean estropadak jokatzeko proposatu zen zonaldean ezingo lirateke osasun eta segurtasun neurriak bete. Lehia aurrera badoa, badiako beste eremu bat hautatu beharko da.
Artxibo irudia. Batelak Pasaiako badian. 
Izaskun Gomez alkateak atzoko ohiko udalbatzarrean iragarri zuenez, Udaltzaingoak txosten bat burutu du datorren uztailaren 11n hastekoak diren estropadetan (KAE eta ETE ligetakoak) osasun eta segurtasun neurriak beteko direla bermatzeko xedez. Alkateak ez die oraindik informazioa alderdi politikoei helarazi, baina plenoan aurreratu zuenez, Pasaiako Portuko Agintaritzak aitortu du euren partetik ez legokeela arazorik lehia aurrera eramateko, betiere bertakoen segurtasuna bermatu ahal bada. Udaltzaingoaren adierazpenari jarraiki, baina, estropadak jokatzeko aurreikusita zegoen eremuan (badiako ohikoa) ezingo lirateke neurri hauek bete; hortaz, estropadak badiako beste eremuren batera lekualdatu beharko lirateke ezinbestean.
Gomezen hitzetan, “oso argi adierazi zitzaien arraun taldeei lehena segurtasuna bermatzea zela ohiz kanpoko egoera honetan”. Edonola ere, alkateak argi utzi nahi izan zuen udalak ez duela eskuduntzarik itsaso eremuan eta, hortaz, Pasaiako Itsas Kapitaintzak emandako argibideen zain dagoela. Edonola ere, alkatea gaur Koxtapeko presidente den Xabier Arrarasekin biltzekoa da, arduradunaren proposamenak aintzat hartzeko asmoz eta egoeraren berri eman diezaioten elkarri.
