Kulturabiruseko aste honetako ekitaldietako sarrerak, eskuragarri
Izaro eta Lohizuneren kontzertua, Hiru binaka zirkuitua, mendi martxa eta Mirari Martiarena eta Idoia Torregarairen bakarrizketa dira ekitaldiak.
Larunbatean estreinatu zuten Arizmendi-eneko lorategia [Arg.: Oiartzungo Udala]. Pasa den asteburuan hasi zen Kulturabirusa, udako ekitaldi kulturalen programazioa. Parte hartze txukunarekin hasi ere. Ostiralean joga saioa egin zuten Iturriotzen, ekitaldiak auzoetara zabaltzeko asmoa argi utziz. Ostiralean Lur Kortak ipuinak kontatu zizkien txikiei. Larunbatean, berriz, Nikole eta Joxe Leonek Parramurritza izeneko kontzertua eman zuten. Arizmendi-enea etxeko lorategiak jaso duen lehen kultur ekitaldia izan da.
Asteburu honetarako lau ekitaldi antolatu dituzte. Gaurtik aurrera eskura daitezke sarrerak Oiartzungo Turismo Bulegoan. 09:00etatik 14:00etara eta 16:00etatik 19:00etara da bulegoaren ordutegia. Sarrerak dohainik izango dira, baina beharrezkoa izango da eskuratzea, edukiera kontuak direla eta. Honakoa da asteburu honetako egitaraua:
Hilak 9, osteguna
- 18:30: Izaro eta Lohizune kantuan (Olalde plazan -Altzibar-. Eguraldi txarrarekin: udaletxeko areto nagusian).
Hilak 10, ostirala
- 19:00: Hiru biñaka zirkuitu ibiltaria (Arizmendi lorategian, Ibargain parkean eta eliza ondoan):
- Jon Martin, Iker Lauroba eta Ane Narbarte.
- Edurne Agirrezabala.
- Maider Zabalegi akustikoan.
Hilak 11, larunbata
- 11:00: Mendi martxa kronometratua.
- 19:30: Bakean dagoena bakean utzi bakarrizketa saioa, Mirari Martiarena eta Idoia Torregarairekin (Arraguako frontoian).
