Agenda 21 programak ezohiko moduan amaitu du ikasturtea
Lehenengo urratsak eta lanketak eginda baina, COVID-19 dela-eta martxora arte egindako lanketarekin amaitu behar izan dute aurten.
Iazko Eskolako Agenda 21en barruko batzarra udala eta ikasleen artean. Klima aldaketa elikadura jasangarriaren ikuspuntutik izan dute aztergai Errenteriako ikastetxeetako ikasleek EA21 Eskolako Agenda 21n barruan. Errenteria-Oreretako 4.800 ikaslek hartzen dute parte programa horretan. Lehenengo urratsak eta lanketak eginda baina, COVID-19 dela-eta martxora arte egindako lanketarekin amaitu behar izan dute aurten.
Lehenengo bi hiruhilekotan planifikatutakoa arazorik gabe eta txukun landu dute: sentsibilizazioa, ikastetxeko diagnostikoa eta komunikazioa. Horiek bai, baina zintzilik gelditu zaizkie hirugarren hiruhilekoan egin beharreko lanketak, herri diagnostikoa tartean.
Horrek, amaierako ondorioak nahi bezain biribil ateratzea zaildu du; halaber, Ikasleen Foroa eta azken Udalbatzarra ere egin gabe gelditu dira. Hala ere, landutakoa bildu eta proposamen zerrenda helarazi diete udal ordezkariei, modu digitalean. Lehen lerroan, bertako eta garaiko elikagaiak sustatzeko konpromiso eskaera. Horretarako, herriko azoka indartu, Beraunen astean behin azoka bat antolatzea bertako produktuen salerosketarako, eta bertako produktuak online saltzeko laguntzak ematea proposatu diote udalari.
Baratze parkea handitu, eta beste zonalde batean baratze gehiago egitea ere bildu dute ikasleek proposamen zerrendara. Kontsumo taldeak ez direla nahikoa ezagunak uste dute, eta indartzea eskatu dute. Taberna, jatetxe eta baserritarren artean harremanak sortzeko bideak lantzea, azken horien produktuei irteera ziurtatzeko, elikadura jasangarriaren gaineko sentsibilizazio kanpainak eta hipermerkatuekin lehiatu ezin duten denda txikiek herriarentzat duten garrantziaz jabetzeko eta bertan nahiz bertako produktuak erostea sustatzeko kanpaina indartsuak egitea ere proposatu dute.
Alperrik galtzen diren elikagaiekin ere kezka azaldu dute, eta denda, taberna eta jatetxeekin horren gaineko lanketa egiten jarraitzea proposatu diote udalari. Gainera laguntza handiagoa eskatu dute Elikagaien Bankuarentzat.
Inork ez du jakiterik nolakoa izango den datorren ikasturte hasiera. Itxaropentsu dira ikasleak, eta udaletxean elkartzeko esperantza dute. Orduan gaia berreskuratu eta Aizpea Otaegi alkateak beraien proposamen zerrendari erantzuna emango dio.
