Alarma egoeran hil direnei agur kolektiboa, hilaren 14an
Ekitaldi xumea eta laikoa izango da, kide bat galdu duten familiei begirakoa, eta parte hartu ahal izateko, ostirala —hilak 10— baino lehen jarri beharko da aurrez harremanetan udalarekin 943 449 611 telefono zenbakira deituta 08:00etatik 14:00etara.
COVID-19ak eragindako alarma egoeran hil diren herritarrei agur kolektiboa egingo die herriak. Udalak antolatutako ekitaldia, hilaren 14an, asteartearekin egingo dute Niessen aretoan, 19:30ean. Ekitaldi xumea eta laikoa izango da, kide bat galdu duten familiei begirakoa, eta parte hartu ahal izateko, ostirala —hilak 10— baino lehen jarri beharko da aurrez harremanetan udalarekin 943 449 611 (Reyes) telefono zenbakira deituta 08:00etatik 14:00etara.
Herritar guztientzako deialdia, berriz, Errenteriako Atean, Nafarroa Etorbidean Niessen parean dagoen eskulturan egin du udalak. Eskultura horren ondoan kandelak jartzera gonbidatu ditu herritarrak omenaldi ekitaldiaren egun berean arratsean, 20:00etatik 00:00etara. Modu sinboliko horrekin irudikatu nahi dute agur kolektiboa eta hildakoen senideei babesa.
Ez dira udalak antolatu dituen ekintza bakarrak. Izan ere, hilaren 14an argiztapen horiz jantziko dute udaletxea gauez, kandelen argiaren koloreari erreferentzia eginez.
Maiatzaren 26an telematikoki egindako udalbatzarrak erabaki zuen omenaldia egitea COVID-19aren osasun larrialdiaren barruan hildakoei eta ahien senideei. Garaiaren gogortasunean jarri zuen azpimarra orduan Aizpea Otaegi alkateak: “Ezinbestekoa da maite ditugunak behar bezala laguntzea, babestuta egotea, joaten diren horiek lagunduta egitea eta dolua egin behar dutenek babesa sentitzea”, eta udalbatzak horretarako baldintzak ematen zirenean merezitako omenaldia eskaintzeko konpromisoa hartu zuen.
Heldu da omenaldia. Ekitaldiaren helburua azken asteetan eta hilabeteetan agurrak izan duen zailtasuna aitortzea da udalaren esanetan, “joan direnen oroimena ohoratzea, kolektiboki merezi duten bezala, eta batez ere, gure maitasuna eta berotasuna erakustea, baita berotasun kolektiboa ere, egoera horretan maite duten pertsona bat galdu dutenei”.