Lezo-Donibane arteko bidea osa dadila eskatu du berriz ere Eguzkik
Lezo-Donibane arteko bidegorria eta eta espaloi zabalagoa eskatu ditu berriz ere Eguzkik. Bidean hainbat pintaketa azaldu dira.
Eguzki Euskal Herriko Talde Ekologista eta Antinuklearrak beste behin eskatu du abian jar dadila Lezo eta Donibane arteko bidegorriaren eta espaloi berriaren egitasmoaren hirugarren zatia. Badira aste batzuk taldeak gaiaz kezkati oharra helarazi zuela, eta horren aurrean, taldearen ustez, aldundiak “kasualitatez, egun batzuk geroago, egiten ari garen zarata isiltzeko” oharra zabaldu zuen. Laster zati hori lizitaziora aterako zuela adierazi zuen oharrean foru erakundeak. “Gai horri etekina ateratzeko asmoarekin, hurrengo hauteskunde autonomikoetan pentsatuz, albiste bat atera zuen aldundiak”, zehaztu dute Eguzkitik. Horren harira, bide horretan pintaketa “espontaneo” batzuk egin dituztela adierazi du taldeak.
Eguzkik oroitarazi du 500 metroko bidea dela oraindik ere bidegorri eta espaloi zabalagorik gabe dagoena, zehazki, garai bateko termikoaren ingurutik doan bide zatiarena; aurretik eginak dituzte azpiegitura horren bi zati Lezotik hasita Donibanerantz. Egitasmoaren hirugarren eta azken zatia da egiteko falta dena, Eguzkiren ustez, arriskuz betea dagoen zatia alegia: “Egia bakarra da, 50 zentimetro eskaseko espaloi zati horretatik igarotzen diren bakoitzean, herritarrek beren burua arriskuan jartzen jarraitzen dutela. Oinezkoek, txirrindulariek eta beste kirolari batzuek bi noranzkoetan errepidearen ondotik igaro behar dute. Gainera, autoek baimendutako gehienezko abiadura gutxi errespetatzen dute”.
Horrela, aldundiak diru publikoa “xahutzen” duela adierazi dute taldeak, “proiektuak behin eta berriz berregiteko, proiektu bat beharrezko egiten duten gauza berriak egunero aurkitzen dituztela argudiatuz. Noiz arte itxaron behar dugu? Istripu bat gertatu arte agian?”.
“Proiektuak behin eta berriz berregiteko” asmoen beste adibide bezala Donibaneko gune historikoko ur saneamenduaren adibidea oroitarazi du Eguzkik: “Saneamenduak urteak daramatza urei buruzko Europako zuzentaraua bete gabe, eta are urte gehiago daramatza proiektuan. Erakundeak ez dira ados jarri konponbide bat lortzeko, hondakin urak Pasaiako badiara isuri aurretik trata daitezen. Bada garaia alderdiek hauteskunde garaian biziberritzeaz etengabe hitz egiten duten badia horrena alde zerbait egiteko”.
