33.291 errenteriar daude deituta bozkatzera igandean
2016ko Euskal Legebiltzarreko Hauteskundeetan 30.840 lagun zeuden hautets erroldan, lau urte geroago, 2.491 lagun gehiagok osatzen dute errolda hori.
Herritar bat bozkatzen Beraungo hautesleku batean. Atzerako kontaketa hasi da. Hiru egun baino ez dira falta Euskal Legebiltzarrerako hauteskundeetarako, eta azken ekitaldi politikoak egiten ari dira alderdi politikoak, ez ohikoa, eta inoiz bizi gabekoa den COVID-19aren osasun larrialdiak markatutako agertokian.
Igandeko hauteskundetara, 33.291 errenteriar daude deituak; horiek dira atzora arte Errenteria-Oreretan erroldatutako 18 urtetik gorako herritarrak. 2016ko Euskal Legebiltzarreko Hauteskundeetan 30.840 lagun zeuden hautets erroldan, lau urte geroago, 2.491 lagun gehiagok osatzen dute errolda hori.
Duela lau urte abstentzioa altua izan zen, %43,31, 2012an baino hiru puntu altuagoa; datu hori ezagutzeko, alderdien emaitzak bezalaxe, igandean hauteskunde eskolek kontaketak amaitu arte itxaron beharko da. 2016ko hauteskundeetan EH Bildu izan zen lehen indarra herrian (4.713 boto). 2012ko legebiltzarrerako hauteskundeetan baino 892 boto gutxiago jaso zituen koalizio subiranistak, baina hala ere, aisa eta alde handiarekin nagusitu zen. EAJ izan zen bigarren indar bozkatuena orduan (4.082 boto); Elkarrekin Podemos, hirugarren (3.570 boto). PSE-EE, berriz, 2012 hauteskundeetan bigarren indar izatetik laugarren indar izatera pasa zen (3.203 boto). PP seigarren izan zen (1.118 boto): eta botoen %2 (348) lortu zuen Ciudadanosek.
Igandean zer gertatuko ote den, zeinek jasoko dituen boto paper gehien eta abstentzioak gora edo behera egingo ote duen ez dago jakiterik. Hori bai, bozkatzera osasun eta higiene neurriak hartuta joatea derrigorrezkoa da, ardura ariketa; boto papera etxetik prestatuta, maskara soinean, eta distantzia fisikoa errespetatuta.
2016ko emaitzak
- Errolda: 30.840
- Boz emaileak: 17.482
- Abstentzioa: %43,31
- EHBildu: Botoen %27,18 (4.713 boto)
- EAJ: Botoen %23,54 (4.082 boto)
- Elkarrekin Podemos: Botoen %20,22 (3.570)
- PSE-EE: Botoen %18,47 (3.203 boto)
- PP: Botoen %6,44 (1.118 boto)
- Ciudadanos: Botoen %2 (348 boto)
