EH Bilduk irabazi du Pasaian, orain dela lau urte baino 190 boto gehiagorekin
EAJ da bigarren indarra, lehen postua galduz, eta PSE-EE hirugarrena, Elkarrekin Podemosen orain dela lau urteko tokia hartuz.
Pasai Antxoko Kultur etxea, udalerriko hauteslekuetako bat. 
Lehen hiru postuetan egon dira aldaketak, orain dela lau urteko emaitzekin alderatuta: EAJk lehen postua galdu du, 1.911 botorekin, eta garaipena EH Bildu taldearentzat izan da, 2.127 pasaitarren hautapenarekin. Hirugarren indarra PSE-EE taldea izan da, 859 botorekin (orain dela lau urte Elkarrekin Podemos zegoen hirugarren postu honetan). Abstentzioa da gaurko datu nabarmenetako bat: %50 baino gehiagok ez du botoa eman, Pasaian.
Lehen hiru indar horietan gorakada bat eman da, 2016ko datuak oinarri izanda: %29aren gorakada EH Bildu taldearentzat, %6a EAJrentzat eta %12 boto gehiago lortu ditu PSE-EE alderdi politikoak. Elkarrekin Podemosek %45eko babes galera jasan du.
Maddalen Iriartek, EAEko EH Bilduren lehendakarigaiak, adierazi du alderdia “oso-oso pozik” dagoela lortutako datuekin. Eskerrak eman nahi izan dizkie, kontuan hartuta bizi dugun osasun egoera, hauteskundeetan parte hartu duten herritar guztiei eta, “batez ere”, euren alderdiarekin bat egin duten horiei.
Parte hartzea
Eusko Legebiltzarrerako hauteskundeetako erroldan 12.324 herritar zeuden izena emanda; haien artean, %48,95ak eman du botoa, 6.032 pasaitar, hain zuzen. Larrialdi egoerak parte hartzea gutxituko zuela aurreikusita zegoen, eta hala izan da: Pasaian ia 7 puntu egin du behera.
Hauek izan dira emaitzak:
- EH Bildu 2.127 (%35,98)
- EAJ 1.911 (%32,32)
- PSE-EE 859 (%14.53)
- ELKARREKIN PODEMOS 592 (%10,01)
- PP+C’S 217 (%3.67)
- VOX 80 (%1,35)
- ATTKAA 43 (%0,72)
- EQUO BERDEAK 42 (%0,71)
- EB-AZ 15 (%0,25)
Beste datu batzuk:
- AbstentzioaK 6.291
- Baliogabeak 56
- Boto zuriak 65
