Hitzarmena sinatu dute gaur goizean Errenteriako Udalak eta UEU Udako Euskal Unibertsitateak, Humanitate Digitalen Ikerketa Gunea sortzeko.
Hitzarmena sinatzeko agerraldia gaur Torrekuan. Argazkia: Herri Bizia 
Hitzarmena sinatu dute gaur goizean Errenteriako Udalak eta UEU Udako Euskal Unibertsitateak, Humanitate Digitalen Ikerketa Gunea sortzeko. Horrenbestez, UEUk arlo horretan duen esperientzia herrira ekarriko da hitzarmenaren bidez, eta Torrekuari bultzada berria emango dio erreferentzia bihurtzeko teknologia berriei dagokionez. Bertan, dagoeneko, gero eta garrantzia handiagoa hartzen ari dira informazioaren eta Komunikazioen Teknologiarekin (IKT) zerikusia duten proiektuak: sei proiektu daude uneotan Torrekuan, eta hogei lagun ari dira horietan lanean.
Halako inbertsioak egitea udalarentzat garrantzitsua dela esan du Aizpea Otaegi alkateak, ” orain are gehiago, izan ere, uste dugu esploratzeko ibilbide zabala duen sektore batentzat aukerak irekitzen dituela”. Udalak 20.000 euroko ekarpena egingo dio proiektuari.
Torrekuan kokatuko den gune horretan, prestakuntza, informazio eta lankidetza ekintzak egingo dituzte sektoreko beste proiektu eta enpresa batzuekin, haien esperientziak ezagutu eta partekatzeko, eta sinergiak eta aliantzak sortzeko unibertsitatearen, udalaren eta beste enpresa teknologiko batzuen artean.
Datozen asteotan Humanitate Digitaletan erreferentea den UEUko Xabier Landabidea ikertzailea Torrekuan lanean hasiko da eta bertatik garatuko ditu ikerketa lanak, sektoreko beste enpresekin eta unibertsitatearekin harremanetan. Gainera, datozen hilabeteetan gunean egingo diren Humanitate Digitalen proiektuen artean, kongresu bat egitea, egindako ikerketa lanak argitaratzea, eta sektoreko erreferentziazko langileen hainbat prestakuntza hitzaldi daude.
Akordioaren garrantzia
Gunearen koordinatzailea den Xabier Landabideak eta UEUko zuzendari Kepa Sarasolak, akordioaren garrantzia nabarmendu dute. Landabidearen hitzetan, modako terminoa bihurtu dira humanitate digitalak unibertsitatean, “gure bizitzak zeharo digitalizatu dira, baina gero eta kontzienteago gara garapen teknologikoak bere horretan ez dakartzala jendeak behar dituen eraldaketak. Teknologia eta gizartearen arteko harremanak esploratu, problematizatu eta balioan jartzen dituzte humanitate digitalek, galdera zaharrei erantzun berriak eta erantzun zaharrei galdera berriak egitea proposatuz”.
UEUn auzolanean sinisten dutela eta gaurko hitzarmena sinatzea horren beste adibide bat dela esan du Sarasolak, “Torrekua, gainera, Humanitate Digitalak garatzeko toki erreferentziala bihurtu nahi da”.
TEKSeko kide den Maitena Urretabizkaiak bere aldetik, proiektu honek ikerketa eta pentsamendua emango diela proiektu eta elkarlanei esan du, eta TEKSek ere teknologia eta ekonomia libre eta eraldatzailearen ikuspuntua emango diola iniziatibari, “hori interesgarria da”.
Oarsoaldeari buruzko kalitatezko informazioa eta gertukoa jaso nahi dudalako. Euskaraz bizi nahi dudalako eta hizkuntzaren biziberritzea bultzatu nahi dudalako.Herrigintza egin nahi dudalako.Oarsoaldeko euskarazko komunitatearen parte izan nahi dudalako. Oarsoaldeko herritarrok behar dugulako.
