Bideoklip lehiaketa abian da
'Zer gertatzen da herrian?' egitasmoarekin Biyurrieneak bideoklip lehiaketa bat antolatu du.
Oiartzungo Biyurrienea gazte taldeak Baga, Biga, Liga egitasmoko hirugarren ekintzan parte hartzeko argibideak jakinarazi ditu. Helburua bideoklip bat grabatzea izanik, Biyurrieneak kanta bat sortu du parte hartzaileek eredutzat har dezaten.
Honako aukerak daude bideoklipa grabatzeko orduan:
- 1- Kantaren letra eta base musikala bakoitzak prestatzea.
- 2- Biyurrieneakoen base musikalean oinarriturik, bakoitzak bere letra propioa sortzea.
- 3- Bideoko kanta bere horretan hartu eta bakoitzak bere bideoklipa sortzea.
Kantaren oinarria edo kanta bera behar izanez gero, esteka honetan sakatu eta deskargatzeko aukera dago.
Behin bideoklipa osatuta biyurrienea@gmail.com helbidera bidali behar da, izenburutzat parte hartutako taldearen izena jarriz. Entregatzeko azken eguna uztailak 31 izango da.
Antolakuntzatik gogorarazi dute saria lortzeko batez ere originaltasuna eta sorkuntza izango direla gehien baloratuko duten irizpideak. Biyurrienekoek dioten bezala: “Jarri zuen irudimena martxan eta izan biyurri!”.
