Izar azpian pantaila erraldoiari so
COVID-19ak baldintzatuta heldu bada ere, ez du hutsik egingo Ozzinema zineklubaren udako zinemak.
Zortzi film aukeratu dituzte, publiko guztiak asetzeko. COVID-19ak baldintzatuta heldu bada ere, ez du hutsik egingo Ozzinema zineklubaren udako zinemak. Pandemiari lotutako osasun eta higiene neurri guztiak zorrotz beteko dituzte, aire librean izango dira eta gonbidapenarekin, ezin bestean. Gonbidapen horiek bibe.me bidez eskuratu behar dira.
Gaur bertan hasi eta publiko zabalari erantzuteko emanaldi egitarau erakargarria osatu du Errenteriako zineklubak; agertokiak txandakatzen joango dira, auzoetara heltzeko, eta eguraldia lagun ez den kasutan, B plana ere antolatua dutela jakinarazi dute antolatzaileek.
Alabergako Goiko plazan izango da emanaldia gaur, eta Pokemon. Pikachu detektibea aukeratu dute. Hilaren 31n, berriz, Lur eta Amets filma emango dute Pontikan. Gainontzekoak, abuztuan denak: 8an Playmobil filma Koldo Mitxelena Ikastetxeko jolastoki estalian; 14an Agur Etxebeste filma Koldo Mitxelenako jolastokian ere; 21ean 70 Binladens filma Pontikan; 22an Rocketman Alabergan; 28an Nosotros Fanderiako tenis pistan; eta 29an Retrato de una mujer en llamas filma, Pontikan.
Emanaldi guztiak 22:00etan hasiko dira.
