Zaintza lehenetsi dute jaiaren gainetik
Madalenak bertan behera utzi dituzte jai batzordeak eta udalak. Hala ere, online ekitaldi sorta antolatu dute ‘Hau bizipoza’ lelopean, zaintza erdigunean jarrita, ospakizun birtual xumea egin dezaten herritarrek.
Jai Batzordea eta udal ordezkariak atzo agerraldian online egitaraua aurkezten. Argazkia: Herri Bizia Bertan behera utzi dituzte madalenak aurten. Arduraz hartutako erabakia da, eta horren atzean jai batzordea eta Errenteriako Udala daude. COVID-19aren osasun larrialdiak jaiak osasun bermeekin ospatzeko ez duela agertoki segururik eskaintzen uste dute, eta horrekin koherente jokatuz hartu dute erabakia. Ez da, beraz, txupinazorik izango, ezta zuzeneko Zentenariorik ere. Kuadrillen Eguneko bazkari jendetsu erraldoia bertan behera utzi dute, eta ez dira Maialen eta Xanti haur artera aterako dantzara; buruhandiek ez dituzte korrika jarriko haurrik ausartenak.
Ohiko jaietako ekitaldirik ez, baina egitarau alternatiboa eta elkar zaintza bermatuko duena prestatu du jai batzordeak: Hau bizipoza! Atzo arratsaldean aurkeztu zuten. Online egitaraua da, Herri Bizia web orrian ikusi ahal izango da. Herriko Erdialdeko plaza eta kaleetan antolatutako erakusketekin osatu dute.
Gazteenentzat madalenak bertan behera gelditu diren lehen aldia izango da; soinean urte batzuk gehiago dituztenentzat, berriz, ez da historia hurbilean bertan behera utzi dituzten lehen aldia. Garrantzitsua da memoria herria egiteko, identitatea osatzeko, historiaren puzzlea ahalik eta osoen irudikatzeko.
Banderen gerra
1983an banderen gerraren testuinguruan, bertan behera utzi zituzten madalenak. Espainiako bandera indarrez ezarri zuten udaletxeko balkoian, eta 60 paisanozko polizia jende artean sartu ziren txupinazoa baino lehen. Jaiak lehertu zituzten eta hamarnaka zauritu eragin, gazte, adineko eta haurrak. Espainiako Poliziaren jantzi marroiek hartu zituzten goitik behera kaleak.
Orduan, protesta egiteko utzi zituzten madalenak bertan behera. Egoeraren larritasuna salatzeko, basakeria agerian jartzeko. Gaur oso bestelakoa da arrazoia, larritasuna ere tartean bada ere; osasuna lehenestea, elkar zaintza erdigunean jartzea, komunitateari merezi duen babesa aitortzea, zehazki.
Komunitateari erantzuteko 20tik gora ekitaldi birtual prestatu dituzte eragileek, ohiko moduan ez, baina jaiei, txikia bada ere, keinu egin ahal izateko. Aitortza merezi duten zalantzarik ez da, egiten ari diren lanarengatik, eta komunitatea ehuntzeko esfortzuarengatik. Baina batez ere, COVID-19aren mehatxuaren aurrean hartu duten erabaki zentzuzko eta arduratsuagatik.
Antolatu dituzten ekitaldi guztiak ere, orain arteko jaiak bezala, herritik eta herriarentzat sortuak dira; arduratik eta konpromisotik, elkar zaintza erdigunean jarri duen herri batetik. Errenteria-Oreretak, gainera, agerian utzi du gai dela berrasmatutako ospakizunetarako, iaioa dela sormenean besarkada, musuak, lagunen eta familien arteko elkartzeak debekatuta izan diren garaietan, eta horren erakusle dira Errenteriaren 700. urteurrenaren ospakizuna, edota aurtengo Sagardo Eguneko ospakizuna balkoi eta leihoetan.
Ospakizuna leiho, balkoi, eta erakusleihoetara eramateko eskatu diete herritarrei.
Mantendu ardura, mantendu konpromisoa, elkarzaintza eta komunitatearekiko errespetua. Hori da jai batzordeak eta udalak bidali duten mezua, herritarrei gin dieten eskaera, ospatuko ez diren madalena hauen atarian: «Zaindu zuen burua, eta zaindu ondokoak; zaindu komunitatea». Horri begira, ostalariekin batera neurri zorrotzak hartuko ditu udalak.
Online egitaraua
Hilak 21, asteartea
- 17:00. Haurren etxeko txupinazo txikia.
- 19:00. Zentenarioa EMKE Banda eta Maialen eta Xantirekin. 19:30. Danborradak.
- 20:00. Hau Bizipoza jaialdia.
- 22:00. Yo he bailado, Live.
Hilak 22, asteazkena
- 12:30. EMKEren kontzertua.
- 13:30. XXXIII. Madalen Sariak. 17:00. Flamenko jaialdia.
- 18:00. Buruhandi eta erraldoiak.
- 18:30. Haur danborradak.
Hilak 23, osteguna
- 12:00:. Miniaturazko trenak.
- 17:00. Eureka dantza jaialdia.
- 18:00. Buruhandi eta erraldoiak.
- 23:00. Zezen suzkoa.
Hilak 24, ostirala
- 12:00. Rally slot irudiak.
- 17:00. Familia dantzan
- 18:00. Buruhandi eta erraldoiak.
- 23:00. Zezen suzkoa.
Hilak 25, larunbata
- 17:00. Limboplaneta (Dejabu).
- 18:00. Buruhandi eta erraldoiak.
- 23:30: EMKE Rock Band Ainara Ortega eta Luis Mari Moreno Pirata-rekin.
