[Bideoa] Pasaitarrek musika eta kolorea jarri diote aurtengo Euskaraldiari
Pasaiako abeslari eta musikariek sortutako 'Bihurguneak' izeneko kanta aurkeztu berri dute, bideoklip eta guzti. Ska eta hip-hop estiloak uztartu dituzte.
Trintxerpeko alkateordetzan egin dute gaurko aurkezpena. Aurtengo Euskaraldirako ederki berotu dituzte motorrak pasaitarrek. Gaur Bihurguneak izeneko kanta aurkeztu dute, bideoklip eta guzti. Hizkuntza ohiturak aldatzeko ariketari musika eta kolorea jarri diote aurten, nola gainera. Bideoklip ederra zintzilikatu dute, «Pasaiatik eta pasaitarren artean egindako sorkuntza» gisa definitu dute sortzaileek. Esteka honetan entzun eta ikus daiteke jada.
Ska eta hip-hop musikak uztartu dituzte abestian. Bihurguneak-en letra Eider Perezek sortu du, eta Emaldi Cereijo, Ane Perezek eta Xabier Perezek ahotsa jarri diote Josu Elberdinek sortutako musikari. Ikus-entzunezkoaren grabaketa eta edizioa aldiz, Egoitz Albizuk egin du.
«Pasaia erakutsi nahi izan dut, euskara gehiago egiteko gogoa duen herria. Indarrak batzeko gai dena, belaunaldi berrien bultzadaz. Bihurguneek batzen dituzte lau Pasaiak eta euskara gure ahotara gehiago hurbilduko duen bihurgunea hartzeko gonbidapena luzatu nahi dugu abestiarekin», esan du gaurko aurkezpenean Eider Perez sortzaileak.
Perezen ondoren, Elberdinek hartu du hitza. Pozik azaldu da emaitzarekin, aitortu baitu giroa sortu eta dantzagarria den abesti bat osatu dutela. «Elkarlanean osatu den abestia izan da. Abesti dinamikoa eta gogoratzeko erraza izatea bilatu dut. Mezua melodiarekin batera itsatsi dadin».
Bigarren txanpa bat
Gaurko aurkezpenean, sortzaile, antolatzaile eta udaleko ordezkariez gain (Euskaraldiko dinamizatzaile Egoitz Albizu eta Euskara zinegotzi Loreto Osa ere bertan izan dira), Lamiak dantza taldeko Edurne Txintxurreta eta Studio 24 dantza akademiako Iker Murillo izan dira. Izan ere, azken bi hauek biribilduko dute egitasmoa, Dantzatu akademia pasaitarrarekin batera. Estilo ezberdinetako dantzariak bildu nahi dituzte, haien arteko fusioa baliatuta bigarren bideoklip bat osatzeko. Urrian aurkeztuko dutela iragarri dute.
