[Galeria] Txirrita parkean, haurrek diseinatutako jolas-eremu berria ireki dute
Unibertsoan oinarritutako "eremu hezitzaile, inklusibo eta dibertigarria" erabilgarri dagoela aditzera eman du Errenteriako Udalak. Adin ezberdinetako haurrek diseinatutako hiru espazio ditu parkeak, bakoitza adin-tarte batentzako pentsatua.
Jolastokiaren irekiera. Prentsaurrekoa. 
Gaur goizean Txirrita parkean bertan egindako prentsaurreko batean, jolasgune berriaren irekieraren berri eman du Errenteriako Udalak. Unibertsoan oinarritutako parkeak adin-tarte ezberdinetarako pentsatutako hiru gune nagusi ditu; haietan guztietan, haurren esperimentazioa eta material berritzaileen erabilera dira nagusi.
Itziar Ostolazak, Hezkuntza zinegotziak, topaketaren lehen agurra egin du esanez “ilusio berezia” egiten diela udaleko kideei halako proiektu bat aurkezteak, COVID-19ak eragindako ezohiko egoera honetan: pandemiaren ondoren bizi izan den larritasun egoerak “bereziki garrantzitsua” egin du “haur eta gaztetxoen eskubideak erdigunean jartzea”, eta eremu berri honekin aisia ardatz izango duen espazio bat ahalbidetuko da, gainera, “osasun neurriak bermatzeko aukera” eskaintzen duena.
Jolas-parkea diseinatzeko prozesua 2017an hasi zen, inguruko ikastetxeak barne hartu zituen sei hilabeteko parte hartze prozesuarekin. Haurrek erabaki zuten gai nagusia unibertsoa izatea nahi zutela, eta hala, Unibertsolandia izenaz bataiatu zuten parkea. 2.000 haur inguruk hartu dute parte diseinuan eta lehen aldia da gaztetxoen iritzia eta lana ardatz izan dituen halako proiektu bat egin dena.
Adinka, elementu ezberdinak sartzea aukeratu dute:
- 0-4 urte bitarteko haurrei bideratutako eremua “esperimentazio” espazioa da. Hiru elementu sentsorialetan dago oinarrituta: ura, hondarra eta labirinto gunea.
- 4-8 urte artekoei zuzendutakoak altuera eta psikomotrizitatea izan ditu ardatz. Aireko eta lurreko jolasak batu dira bertan, eskalada, egurrezko zirkuituak… eta bestelakoekin.
- Azkenik, 8-12 urte bitarteko gaztetxoek “elkartze guneak” nahi zituztela erabaki zuten. Hala, toboganak eta hainbat eserleku berezi ahalbidetu dira haientzat.
Larritasun egoerak ezinezkoa egin du udalaren nahi nagusia, oraingoz, betetzea: uda garairako, jolas-parkea prozesuan parte hartu zuten haurrekin irekitzea. Jai antzekoa udazkenean egitea dago aurreikusita, baina gaurtik aurrera nahi duen orok gozatu ahal izango du Unibertsolandia jolas-eremu berriaz.
Eneko del Amok, Hirigintza zinegotziak, adierazi du parkearen eraikitze lanek lau hilabete eta erdiko iraupena izatea espero zutela, baina pandemiagatik luzatu egin dira; “azkenean” ametsa egi bihurtu dela esan du Del Amok. Maite Gartzia Gazteria arduradunak herriko haur eta gurasoak eremu berriaz disfrutatzera hurbil daitezen animatu nahi izan ditu.
Udaleko kideek gogorazi nahi izan dute hesituta dauden parke zatiak “belarra ongi jaio arte” ezin izango direla zapaldu.
