'Ni ere hari batetik zintzilik', Zintzilik Irratia laguntzeko
Zintzilik Irratia laguntza eske hasi da, koronabirusaren krisiak eurengan ere eragina izan duelako. "Zozketa mundiala" prestatu dute horretarako.
Irratiko kideak, zozketa iragartzen. Babes eta laguntza kanpaina abiatu du Zintzilik Irratiak. Ni ere hari batetik zintzilik izena jarri diote. Rifen salmentan (euro batekoak) oinarrituko da kanpaina, hilaren 21ean hasi (asteartean), eta abenduaren 21era arte (San Tomas Eguna); orduan egingo dute “zozketa mundiala”. Errenteria-Oreretan eta Oarsoaldeko herrietan, gainera, material salmentarako mahaiak jarriko dituzte noizbehinka (lehena hilaren 24an Errenteria-Oreretan). Sare sozialak erabiliko dituzte aldi berean kanpainaren gainekoak jakinarazteko, tartean noiz eta non jarriko dituzten salmentarako mahaiak.
Koronabirusak eragina izan fu Zintzilik Irratian ere bai. Herrian egin behar ziren Arrosa Sareko topaketak bertan behera utzi behar izan ziren, baita VII. Taupada Fest jaialdia. Gainera, udan ezin izango diete kolektibo eta eragileei txosna alokatu, herrietako festak bertan behera gelditu direlako, “azken hionek modu zuzenean eragiten dio irratiaren ekonomiari. Gure iturri ekonomiko nagusia izan delako azken urte hauetan”. Zintzilik Irratiaren funtzionamendua behar den moduan mantentzen beharrezkoa zen txosnaren alokairutik ateratakoa.
Rifak saltzen eta bestelako materiala zabaltzen bost hilabetez egongo dira irratikoak eta haien kolaboratzaileak. Hiru sari prestatu dituzte saritutako txartelak izango dituztenentzat. Honakoak:
- 1 saria: Epiphone gitarra elektrikoa Harley Benton anplifikadorearekin, eta lote kulturala.
- 2. saria: Taupada Fest lotea (2021eko jaialdirako bi sarrera eta kamisetak), eta lote kulturala.
- 3. saria: Zintzilik Irratia lotea (kamisetak, DVDak, pegatinak…), eta lote kulturala.
Lotu kulturaren barruan sartzen dira Errenteria-Oreretako abeslari, idazle, talde eta kolektiboek emandako 35 bat sari, hiru irabazleen artean banatuko direnak.
Informazio gehiagorako irratiarekin harremanetan jarri behar dute interesdunek, haiei posta elektronikoa bidaliz.
Iazko udazkenean 35 urte bete zituen Zintzilik-ek hedabide libre, asanbleario eta autogestionatu bezala. Hainbat jarduera egin zituzten urteurrenaren harira.
