Zaintza, ardura eta elkartasuna
Egun hauek, beste moduan bizitzea egokitu da aurten, hurrengo urtean handiagoak izan daitezen, baina batez ere elkartasuna eta zaintza erdigunean jartzen dituen komunitatea izaten jarraitzeko. Hori deia, hori eskaera: ardura, zaintza eta elkartasuna.
Jai Batzordea eta udal ordezkariak atzo agerraldian online egitaraua aurkezten. Argazkia: Herri Bizia Egun berezia gaurkoa egutegian, ezin uka. Egoera normala balitz, pandemiaren mehatxurik gabekoa, atzera kontaketa ia amaierara heltzear legoke. Maite ditugu madalenak, lagunartea, familiartea, herritik herriarentzat sortutako jaiak, eta horietan azken urteetan ere aldaketa nabarmena izan da, komunitateak pisu izugarria hartu duelako. Komunitate horri berari, arduraz jokatzea dagokio orain, eta hala ari den zalantzarik ez da. COVID-19a bizitza hankaz gora jartzera heldu zen une beretik, zaintza erdigunean izan da Errenteria-Oreretan, instituzioetatik hasi —udala alegia,— eta eragileekin, gazteekin, haurrekin, adinekoekin, dendari eta ostalariekin, osasun langileekin, herritarrekin amaituta.
Ardura izan da nagusi, elkartasuna, norbera eta komunitatearen zaintza bihurtu da helburu; eta hori, ordaintzerik ez da.
‘Ez jaien’ datak dira gaurtik hasi eta 25era artekoak. Madalenak bertan behera uztea erabaki dute jai batzordeak eta udalak ardura ariketa eredugarria zabalduz. Harago joan da udala, komunitatearekiko azken urte luzeetan erakusten ari den konpromisoarekin, eta tabernen itxiera arautzeko dekretua egin du berariaz koronabirusaren hedapena saihesteko. Herritarrek izan behar dutelako ardura, baina instituzioek eredu eta bide izan behar dutelako. Goizaldeko ordu batetarako itxita beharko dute ostalaritza establezimenduek. Eta garrantzitsuena, erabaki hori, herriko ostalaritza establezimenduekin adostuta hartu du, gauza gutxi izango direlako konplizitatean aritzea baino eraginkorragoak. Besteak aintzat hartu eta elkarrekin aritzea da gakoa, denona baita arazoa, eta beraz, ardura.
Ostarik udalaren erabakia babestu du; ardura eskatu die herritarrei, ez daitezen erlaxatu, COVID-19a gure artean dagoelako, eta beraiek espazio seguruak eraiki nahi dituztelako beren establezimenduetan herrikideentzako. Ardurarako deiaren lekukoa hartu dute ondoren, OaingozHau mugimenduak, eta elkarte gastronomikoak ere, eta zerrenda luzea dago atzean.
Egun hauek, beste moduan bizitzea egokitu da aurten, hurrengo urtean handiagoak izan daitezen, baina batez ere elkartasuna eta zaintza erdigunean jartzen dituen komunitatea izaten jarraitzeko. Hori deia, hori eskaera: ardura, zaintza eta elkartasuna. Bide horretan, online egitarau aberatsa sortu du jai batzordeak, zaintza ospatzeko, arduraz aritzeko, elkartasuna irriz janzteko.
Errenteria-Oreretak eredugarri dela erakutsi du… segi horretan.
Online egitaraua
Hilak 21, asteartea
- 17:00. Haurren etxeko txupinazo txikia.
- 19:00. Zentenarioa EMKE Banda eta Maialen eta Xantirekin. 19:30. Danborradak.
- 20:00. Hau Bizipoza jaialdia.
- 22:00. Yo he bailado, Live.
Hilak 22, asteazkena
- 12:30. EMKEren kontzertua.
- 13:30. XXXIII. Madalen Sariak. 17:00. Flamenko jaialdia.
- 18:00. Buruhandi eta erraldoiak.
- 18:30. Haur danborradak.
Hilak 23, osteguna
- 12:00:. Miniaturazko trenak.
- 17:00. Eureka dantza jaialdia.
- 18:00. Buruhandi eta erraldoiak.
- 23:00. Zezen suzkoa.
Hilak 24, ostirala
- 12:00. Rally slot irudiak.
- 17:00. Familia dantzan
- 18:00. Buruhandi eta erraldoiak.
- 23:00. Zezen suzkoa.
Hilak 25, larunbata
- 17:00. Limboplaneta (Dejabu).
- 18:00. Buruhandi eta erraldoiak.
- 23:30: EMKE Rock Band Ainara Ortega eta Luis Mari Moreno Pirata-rekin.
