Madalenak bertan behera uzteko erabakia babestu du Ostarik
Madalenak bertan behera uzteko erabakia babestu du Ostarik, batetik, eta gainera, adostasuna adierazi dute udalak egin berri duen dekretuarekin. Horren arabera, hilaren 21 eta 25aren artean ostalaritza establezimenduen itxiera ordutegia 01:00etara mugatu du.
Agerraldia egin dute Ostariko eta udal ordezkariek. Argazkia: Herri Bizia Gero eta gertuago daude madalenen datak. Aurten ez dira, baina, jaiak ospatuko, jai batzordeak eta udalak erabakita, zaintza eta osasunari lehentasuna erabatekoa emanda. Hala ere, kezka azaldu dute hainbat erakunde eta gizarte eragileek COVID-19aren hedapenak osasunerako dakarren arriskuagatik. Kezka horrekin bat egin du Ostari Errenteriako Ostalaritza Elkarteak, eta kezkatik konpromisora egin du jauzi gaur, Aizpea Otaegi alkatea eta Eneko del Amo zinegotziarekin batera egin duten agerraldian. Izan ere, madalenak bertan behera uzteko erabakia babestu dute, batetik, eta gainera, adostasuna adierazi dute udalak egin berri duen dekretuarekin. Horren arabera, hilaren 21 eta 25aren artean, ohiko egoeran madalenak ospatzeko datetan, ostalaritza establezimenduen itxiera ordutegia 01:00etara mugatu du.
Espazioa seguruak sortzea dute helburu berrogeialdiaren ostean berriz ere lanera itzuli zirenetik Ostari osatzen duten establezimenduek, “eta gure establezimenduetan leku seguruak sortzeko lanean jarraitzeko konpromisoa berretsi nahi dugu”.
Jaiak bertan behera utzi badituzte ere, Ostaritik jakinarazi dute egun horietan ohikoak diren konpromiso gastronomiko eta hitzordu sozial batzuk mantenduko direla egiaztatu dutela, “badakigu horietako asko gure establezimenduen inguruan egingo direla, eta erantzukizuna eskatu nahi dugu, norbanakoaren erantzukizuna elkarzaintzarako konpromisoa izan behar dugulako, osasun protokoloak kontuan hartu, horiek errespetatu, eta arrisku egoerak saihestea dagokigulako”.
Azken egunetan izaten ari diren agerraldiei erreparatu diete arduraz jokatzeko eskatzeko herritarrei, “alarmak piztu dituzte eta zuhurtziaz jokatzea dagokigu. Badakigu egun horiek gehiengoarentzat hunkigarriak direla, baina orain arduraz jokatzea dagokigu. Osasuna eta animo”.
