AHTaren Lezo eta Oiartzungo zatiari helegiteak jartzera deitu dute
Abiadura Handiko Trenaren Astigarraga-Oiartzun-Lezo zatia informazio publikora atera du Espainiako Sustapen Ministerioak eta alegazioak jartzeko epea, abuztuaren 3an —astelehena— amaituko da.
AHTaren kontrako elkarretaratzea. Artxiboko irudia. Abiadura Handiko Trenaren Astigarraga-Oiartzun-Lezo zatia informazio publikora atera du Espainiako Sustapen Ministerioak eta alegazioak jartzeko epea, abuztuaren 3an —astelehena— amaituko da. Horren harira, herritar talde batek alegazio txostena landu du proiektuari kritika zorrotza eginez bai ingurumenean eragingo dituen kalteengatik, bai arlo sozio ekonomikoan proiektuak “justifikaziorik gabeko proiektuak” izango duen eragin txikitzaileagatik.
Alegazio txosten zabala landu dute, 24 orrikoa, eta zehatz jasotzen ditu proiektuak izango dituen ondorioak. Astigarraga, Oiartzuneta Lezo lotuko dituen zatia, 7,150 kilometro luze da, zabalera mistokoa da eta Martutenetik Oiartzungo Mendin Berri urbanizazioa lotzea aurreikusten du. “Erdi lurperatutako egitura konplexuko hormigoi kutxa erraldoia da, bi pisukoa. Proiektuak gainera, Oiartzunen hasi eta Lezo-Gaintxurizketan amaituko den 3,2 kilometroko bigarren trenbide lotunea aurreikusten du. Lezo Gaintxurizketa zonalde horretan plan batzuk merkantzietarako geltoki intermodala, eta Pasaiako portuarekin lotzeko trenbidearen adar independentea eraikitzea aurreikusten dute”.
Astigarraga-Lezo zatia eraikitzeko 476 miloi euro aurreikusi dituzte, 50 miloi kilometroko, Martutenetik Oiartzunera. Oiartzungo lotunea egiteko 63 milioi euroko aurrekontua aurreikusi dute. Ingurumenean izango duen eragina latza izango da, baina ez soilik hori, ekonomikoki ere ikaragarria izango da eragina; zazpi kilometro egiteko aurreikusitako aurrekontuari erreparatu baina ez dago.
Ingurumenean izango duen eraginaren gainean, aipamen batzuk baino ez: 328 metro luze eta 30 metroko altuerako biaduktoa eraikitzea aurreikusi dute proiektuaren barruan Oiartzun ibaiaren gainean Ugaldetxon. Bizarain inguruan, berriz, 5,6 kilometroko tunela egitea aurreikusi dute, eta Gaintxurizketako zatian azken urteetan nekazari gazteei begirako proiektu agroekologikoaren gainean eragina izango du. Horiek batzuk baino ez dira, baina proiektuaren eragina ezagutzeko herritar taldearen txostena irakur daiteke.
Herritarrei eskaera zehatza egin diete: “Alegazioak aurkeztu”. Horretarako eredu bat jarri dute eskura, hura bere horretan bete eta aurkezteko, edota oinarri hartuta moldatzeko. Alegazioak aurkezteko epea, abuztuaren 3an amaituko da. Hemen, prestatu duten alegazioa.
