Alemaniako Quantum Groupek Papresa eskuratu du
Taldeak azaldu duenez egungo plantilla mantendu egingo du %100ean —222 langile ari dira lantegi horretan— eta fabrikazioa dibertsifikatu egingo du eskaera handiagoa duten produktuetara zabalduz, enbalajerako kartoi-papera kasu.
Alemaniako Quantum Groupek Papresa eskuratu du. Lanpostuen %100 mantenduko duela esan du talde inbertitzaileak. Alemaniako Quantum Group inbertitzaileak Errenteria-Oreretako Papresa lantegia eskuratu du. Taldeak azaldu duenez egungo plantilla mantendu egingo du %100ean —222 langile ari dira lantegi horretan— eta fabrikazioa dibertsifikatu egingo du eskaera handiagoa duten produktuetara zabalduz, enbalajerako kartoi-papera kasu.
Langileak mantentzearekin batera, beste konpromiso bat ere hartu du talde alemaniarrak: ingurumenaren optimizaziora bideratuko du hasierako inbertsioen erdia. Beste helburuen artean eta Quantum berak azaldu duenez, merkatua nazioartera zabalduko du, Asiara zehazki, eta halaber, Europan sare komertzial propioa ezarriko du. Dibertsifikazioaren atzean, prentsarako paper eskaerak izan duen jaitsiera dagoela azaldu dute, “azken bost urteetan %6 egin du behera urtero eskaera horrek industria editorialen digitalizazioarengatik”.
Espainiako Estatuko paper ekoizleen artetik zortzigarrena da egun Papresa, eta iaz 140 milioi euroko fakturazioa izan zuen, 21 milioi euroko ustiapen irabazi garbiekin—Ebitda—. Urtean 375.000 paper tona prozesatzeko gaitasuna du egun Papresak.
