Tabernariek eta udalak datozen egunetan arduraz jokatzeko eskatu dute
Xanistebanak ospatuko ez diren arren, datozen egunetan otorduak egongo dituztela jakitun dira. Arauak errespetatzeko eskatu dute; tabernak 01:00etan itxiko dituzte.
Tabernen ordutegia murriztuko dute [Argazkia artxibokoa da]. Aurten ez da xanistebanik ospatuko, Udalak eta Jai Batzordea osatzen duten eragileek aho batez erabakita. Gainera, ez dute ordezko ezer antolatuko. Festetako osagai nagusietako bat tabernak izan ohi dira, eta horregatik, udalak eta Oiartzungo Tabernarien Elkartea bildu eta adostasun batera iritsi dira.
Festarik antolatuta ez dagoen arren, abuztuaren 2tik 6ra arteko egunetan hainbat otordu egongo direla badakite. “Lagunarteaz eta familia-giroaz gozatzea zilegi da”, adierazi du udalak ohar baten bidez, “baina indarrean dauden arauak errespetatuz eta arduraz jokatuz, kolektiboaren onuran pentsatuz”.
Gogorarazi dute osasun larrialdi egoeran jende pilaketak saihestea —eta ondorioz, kutsatzea— dela helburu nagusia.
Tabernak, toki seguruak
Azken asteetan COVID-19ak sortutako egoerak hobera ez du egin, eta Gipuzkoan hainbat foku agertu dira. Oiartzunen izena ez dute zerrenda horretan ikusi nahi. Orain arte ez da fokurik atzeman, eta horrela jarraitzeko desioa dutela azaldu dute: “Arauak errespetatuz ekidin dezakegu elkar kutsatzea. Guztion esku dago”.
Tabernariek eta udalak arduraz jokatzen jarraitzeko eskatu dute. Tabernak toki seguruak direla esan dute, arauak errespetatzen baldin badira. Tabernako langileen eta gainerako bezeroen osasuna zaintzea guztien ardura dela nabarmendu dute.
Ordutegietan ere nabarituko da egoera ez dela ohikoa. Oiartzungo tabernak 01:00etan itxiko dira eta barran ezingo da kontsumitu 00:00etatik aurrera. Eusko Jaurlaritzaren dekretua jarraituz, musukoak derrigorrezkoak izango dira kontsumizio-garaitik kanpo eta gehienez 10eko taldeetan elkartu ahal izango da tabernetan.
Udalak Oiartzungo Tabernarien Elkartearen jarrera eskertu du. “Hasieratik elkarlanerako eta elkarrizketarako prestutasuna adierazi dute, baita euren lantokia eta bezeroak babesteko kontzientzia”.
