COVID-19 gaitzari aurre egiteko inbertsioak diruz lagunduko ditu Pasaiako Udalak
Tokiko merkatariak eta ostalariak laguntzea dela helburua adierazi du Izaskun Gomez alkateak. Irailaren 15era arte irekita egongo da eskaera epea.
Saltoki txikiek eta ostalariek koronabirusaren aurka egindako inbertsioak diruz-laguntzea da xedea. Pasaiako Udalak koronabirusari aurre egiteko inbertsioak diruz lagunduko ditu, Gipuzkoako Foru Aldundiko Ekonomia, Sustapena, Turismoa eta Landa Ingurune departamentuaren finantzazio programaren barruan. Hala aditzera eman du aste honetan udal gobernuak, eta tokiko merkatarien eta ostalarien egoera arintzea dela helburua argitu du. Hortaz, koronabirusaren aurka egiteko lokalak osasun neurrietara egokitzeko azterlanak eta ekipamenduak aintzat hartuko ditu diru-laguntzak.
Hori horrela, 43.950 euroko diru saila bideratuko du udalak hamar langile baino gutxiagoko enpresak eta langile autonomoak laguntzera, eta zehaztu duenez, 5.000 euro izango da gehienezko laguntza kopurua. Eskaera egiteko interesa duten lagunek irailaren 15era arte egin dezakete Pasaiako Udalaren erregistro elektronikoan eta Herritarren Arreta Zerbitzuan (HAZ).
