Festa giroarekin lotutako jarrera «arduragabeak» deitoratu ditu udalak
Deialdi ezberdinetan elkartu direnei arduragabekeria leporatzeaz gain, «buila» egitea eta inguru guztia «zikina» uztea egotzi die udalak.
Xanistebanetako 2019ko txupina jaurtiketa. Oiartzungo Udalak festa giroarekin lotutako jarrera «desegokiak» atzeman dituela jakinarazi du gaur komunikabideetara igorritako ohar batean. Jarrera horiek «arduragabeak» izan direla deitoratu du «jende pilaketak» egoteko deialdiak izan baitira. Areago, elkarretaratze horietan musika jarriz «buila» egitea egotzi die, bizilagunak «molestatuz» eta «inguru guztia zikinduz».
Jende pilaketak ekiditeko helburuarekin Xanistebanak ez ospatzeko erabakia Oiartzungo Jai Batzordearekin elkarlanean hartu eta ostalariekin partekatu zutela zehaztu du udalak. Eta denen borondate «onari» esker errespetuzko egoerak nabarmendu direla txalotu du tokiko gobernuak.
«Ezin dugu ahaztu bizi dugun egoera. Ez da beldurrez ibili behar, baina arduraz eta errespetuz jokatzeko unea da», bukatu du.
