Alhambra tabernako zerbitzari batek COVID-19an positibo eman duela dio udalak
Koronabirus kasu bat dela-eta Alhambra taberna itxita dagoela jakinarazi du udalak, nahiz eta Udaltzaingoak HITZA-ri baieztatu dionez, tabernako arduradunak eta haien alaba dira kutsatutakoak.
![Alhambra tabernan agerraldi bat egon daitekeen ikertzen ari dira [Irudia: Bar Alhambra].](https://oarsoaldea.hitza.eus/site/files/2020/08/alhambra-copia.jpg)
Alhambra tabernan agerraldi bat egon daitekeen ikertzen ari dira [Irudia: Bar Alhambra]. Arragua auzoan kokatutako Alhambra tabernaren gaineko zurrumurruen inguruan, zerbitzarien artean positibo bat izan dela adierazi du Oiartzungo Udalak. Familia arteko kutsatzea edo transmisio orokorragoa izateko arriskurik ote dagoen aztertzen ari dela Osasun Saila gaineratu du oharrean, eta lasaitasunera deitu ditu herritarrak. Taberna itxita egongo dela momentuz gaineratu dute.
Hala eta guztiz ere, udalak oharra kaleratu aurretik Oiartzungo Udaltzaingoarekin harremanetan jarri da HITZA, eta establezimenduko bikote arduradunak eta haien alabak koronabirusan positibo eman dutela baieztatu dute. Haiek emandako informazioaren arabera, tabernako gainontzeko langileei PCR probak egiten ari dira uneotan COVID-19 agerraldi berri bat egon daitekeen ondorioztatzeko. Emaitzen arabera erabakiko du Osasun Sailak zein protokolo aktibatu.
