I. Rosmi Bandera etxera ekarri du Hibaikak
Santanderren lehiatu dira San Pedro, San Juan eta Hibaikako ontziak asteburuan, eta bandera bakarra lortu arren, goi postuetan sailkatzea lortu dute Oarsoaldeko bote gehienek.
![Hibaikak I. Rosmi Bandera etxera ekarri du [Irudia: Hibaika].](https://oarsoaldea.hitza.eus/site/files/2020/08/rosmi.jpg)
Hibaikak I. Rosmi Bandera irabazi du Santanderren [Irudia: Hibaika]. Oarsoaldeko bote guztiak Santanderren (Kantabria, Espainia) arraun egin dute asteburuan. ETE, KAE1 eta KAE2 ligetako ontziek bandera bakarra etxera ekarri duten arren, sailkapenaren goi postuen artean kokatzea lortu dute Oarsoaldeko klub gehienek.
Hibaikako nesken eskifaiak hirugarren postua eskuratu zuen larunbatean jokatutako zazpigarren jardunaldian 11.35,097 marka eginda, eta I. Rosmi Bandera irabazi zuen atzokoan 11.29,09 denborari esker. San Juango arraunlariek bere aldetik, zazpigarren amaitu zuten larunbatean (11.57,64) eta seigarren atzokoan (11.50,21). Asteburuko emaitzek sailkapen orokorreko hirugarren postura eraman dute Hibaika, eta laugarrenera San Juan.
KAE1 eta KAE2 ligetako arraunlariek L. Santander Hiria Bandera eta XV. Marina de Cudeyo Bandera irabazteko lehiatu dira asteburuan. Bigarren sailkatu da San Pedroko ontzia bi egunetan, 20.22,77 eta 20.15,80 markak eskuratuta, hurrenez hurren. San Juango boteak bere aldetik, laugarren lekua bete zuen larunbateko estropadan 20.35,24 markarekin, eta azken postua eskuratu zuen atzokoan, 20.52,13 denbora lortuta. Hori horrela, sailkapen orokorreko bigarren postuan jarraitzen du San Pedrok, eta seigarrenean, San Juanek.
Hibaikaren gizonen ontziak zortzigarren postua bete du azken bi estropadetan Santanderren, 22.45,64 denborarekin larunbatean, eta 22.22,60 atzokoan. Hala, sailkapen orokorreko zortzigarren postuan ere dago ontzi gorria azken jardunaldien ondoren.
