Altzateko ur jolas parke berria etzi inauguratuko du udalak
Adin tarte ezberdinetako haur eta gaztetxoei zuzenduta dago igerilekuetako gune berria. Osasun Sailak espazioa irekitzeko baimena berretsi du.
Ur jolas parkeak Altzate igerilekuen eskaintza osatuko du aurrerantzean. Altzate igerilekuetako ur jolas parkea etzitik aurrera egongo dela erabilgarri ezagutarazi du Lezoko Udalak. Maiatzetik abuztura bitartean parkea eraiki dute, eta orain, Osasun Sailaren baimena jasota hori zabaltzeko prest daudela jakinarazi dute.
Hortaz, 100 metro koadroko azalera duen jolas guneaz disfrutatu ahalko dute lezoarrek aurrerantzean. Lehen dutxak kokatuta zeuden lekuan dago orain parkea, eta igerilekuen eskaintza osatuko duela ziur agertu dira udal ordezkariak. Gainera, adin tarte ezberdinetarako prestatuta dago: 0 eta 4 urte artekoen gunea, familia eta haurren txokoa, eta gaztetxoena.
Osasun neurri eta berme guztiak beteta zabalduko dute Altzaten espazio berria. Hori dela eta, gune honetaz gozatzeko helburuarekin, herritarrei orokorrean, eta Altzateko erabiltzaileei zehazki, segurtasun neurri guztiak bete eta errespeta dezaten galdegin die udalak.
