Arraguako tabernako positiboak familiartean kutsatu direla zehaztu du udalak
Kutsatzea senideen artean eman dela ondorioztatu du Osasun Sailak, eta beraz, bezeroei ez zaie PCR probarik egingo momentuz.
Arraguako haur parkea denbora baterako itxi du Udaltzaingoak. Arragua auzoko tabernan izandako koronabirus agerraldiaren harira, lasaitasunera deitu du gaur Oiartzungo Udalak. Izan ere, tabernako langileen artean emandako positiboak familiartean kutsatu direla ondorioztatu du Osasun Sailak. Areago, jarraipena egin dutela ohartarazi du udalak eta azaldu duenez, «egun hauetan positibo eman duten pertsona horiekin kontaktu zuzena izan duten pertsona guztiek PCR proban negatibo eman dute, baita familiako kide ez diren tabernako beste langileek ere».
Hori horrela, Osasun Sailak ez du momentuz beharrezkoa ikusten bezeroei PCR probarik egitea. Familia berrogeialdian jarri dute, eta taberna itxita egongo da egoerak bere onera egin arte.
