ETE Ligan Hibaika indartsu, eta San Juan hatsik gabe
Sailkapeneko bigarren postuan jarri dira errenteriarrak, Euskotren Ligara igotzeko hautagai sendo dira. San Juanek agur esan dio igotzeko aukerari.
Hibaikakoak, hilaren 16an I. Rosmi Bandera irabazi ondoren. Argazkia: Hibaika AE Azken estropadetako joerak berretsi egin dira ETE Ligan asteburu honetan, Oarsoaldeko traineruei dagokienez bai behintzat. Hibaika indartsu bukatzen ari da liga, eta San Juan, hatsik gabe dago, gainbeheran.
Atzoko estropadan, Erandion, Hibaika hirugarren izan zen Tolosaldea irabazletik sei segundora eta bigarren gelditu zen Deustotik bakarrera. Larunbatean, Bilboko Ikurrinan, errenteriarrek bigarren postua eskuratu zuten Tolosaldearen atzetik. Hau da, bi postu oso interesgarri sailkapenean gora egiteko, eta Euskotren Ligara igotzeko play-offean aritzeko bigarren lekua bereganatzeko. Izan ere, orain, Hibaika bigarrena da ETEko sailkapen nagusian —Tolosaldea liderra harrapatzea ezinezkoa du— 64 punturekin, Zumaiarekin berdinduta. Zumaiarekin lehia estua izango dute Madalen ontzikoek hurrengo asteburuan Castron izango diren bi estropadetan bigarren postu horren bila. Azken estropadetako joera ikusita, Zumaia beti gelditu da Hibaikaren atzetik. Beraz, aukera sendoak dituzte errenteriarrek play-offean sartzeko. Baina hori uretan erakutsi behar da.
San Juan larri heldu da ligaren azken txanpara. Liga hasieran goiko postuetan ibili ziren Batelerak, baina azken aldian estu dabiltza. Asteburuko bi estropadak horren lekuko: larunbatean, Bilboko Ikurrinan, alde nabarmenarekin azkenak izan ziren batik bat ziabogan arazoak izan zituztelako (hainbat ezusteko baja ere badituzte), eta atzo (igandea) zazpigarren Erandion. Horrenbestez, mailan gora egiteko ametsa ahaztu, eta eskifaia gazteak trebatzen jarraitu beharko du hurrengo urtean ere ETE Ligan. Asteburuko Castroko bi estropadak tramitezkoak izango dira arrosentzat, sailkapen nagusian seigarren direlako bigarren posturik 13 puntura.
