Mural baten bidez Ondartxo pasealekua ireki dezaten eskatu dute sanpedrotarrek
Puntetarako eta farorako bideek itxita jarraitzen dute negutik. Egoerari konponbidea emateko aldarria luzatu nahi izan dute, beste behin, San Pedroko herritarrek, mural baten bitartez honako honetan.
Osteguneko bilkuran zintzilikatutako murala. Argazkilaria: Erik Salazar. 
Pasa den ostegunean sanpedrotarrek herriko pasealeku nagusiak irekitzeko errebindikazio ekintza berria egin zuten: Kalparra alboan dagoen hesia (zeinak pasealekura sarbidea galarazten duen) “Puntas ireki” aldarria daraman mural batekin estali zuten. Horrez gain, herritarrek euren ekarpenak egiteko aukera ere izan zuten eta errotuladorez pasealekua zabaltzeko eskaeraz josi zuten pankarta, “Alternatibak nahi ditugu” bezalakoak idatzi zituzten. Gaur, astelehena, murala ez zegoen, jada, bertan.
San Pedroko pasealeku nagusia martxo hasieran itxi zuen Pasaiako Portuko Agintaritzak, luizi batzuek eragindako kalteek oinezkoen segurtasuna bermatzea galarazten zutela argudiatuta. Ordutik hesi batzuek oztopatzen dute puntetarako eta farorako bidea, eta sanpedrotarrek egoerari konponbidea eman diezaioten exijitzen jarraitzen dute. Bilkurak, manifestazio zaratatsuak eta bestelako iniziatibak egin diren arren, oraindik ez da lortu herritarren xede nagusia: Ondartxo pasealekua zabaltzea pasaitarren oinarrizko beharrak ase ahal izateko.
