San Pedroren garaipen estua Getxon
San Pedroren garaipen estua Getxon. Pedreña, Deusto, Arkote eta San Juanen hatsa ondo-ondoan izan dute moreek. San Juanek hiru segundoko zigorra jaso du.
San Pedro, atzo banderarekin. Argazkia: Javi Dominguez. KAE1 Ligako Getxoko bandera irabazi zuen atzo San Pedrok. Liga horretako hamargarren estropada izan zen. Nola irabazi gainera: bigarren, hirugarren eta laugarren hurrenez hurren izan ziren Pedreña, Deusto eta Arkoteri segundo pasako aldea atera zien, eta San Juani ia laukoa. Arrosek eta Deustok hiru segundoko zigorra jaso zuten.
Ziaboga guztietan denborarik onena San Juanek egin zuen. Baina azken luzean erabaki zen lehia, izan ere, San Pedrok lortu zuelako pare-parean izan zituen beste traineruak doi-doi atzean uztea. San Juanek gertu izan zuen bandera, baina moreen azken metro ikusgarriengatik nahiz Erreka-k jaso zuen zigorragatik Libia izan zen garaile azkenean.
Gauzak horrela, eta KAE1eko liga bukatzeko bi estropada falta direnean (biak datorren asteburuan dira, Castron), sailkapen nagusian bigarren da San Pedro 10,70eko puntuen batezbestekoarekin, Pedreñaren atzetik (11,60ko batezbestekoa du). Sailkapen horretan San Juan seigarrena da, 7,50eko batezbestekoarekin. Beraz, Eusko Label Ligara igotzeko play-offa ia eskuan dute moreek, eta sanjuandarrek hurrengo urtera begira jarri beharko dute maila igoerara begira jartzeko.
Larunbateko KAE1eko estropadan (Algortan) San Pedro laugarren izan zen Pedreña irabazletik 12 segundora. San Juan zazpigarren postuan sailkatu zen.
KAE2
Hibaikaren gizonen traineruak ere bi estropada izan ditu asteburuan, Getxon atzo eta Algortan larunbatean. Bietan bederatzigarren izan da.
