Ulia mendia ehizarik gabeko eremu izendatu dute
Gipuzkoako Aldizkari Ofizialean iragarri denez, irailaren 1etik aurrera Ulia mendian ezingo da ehizarik egin. 2014ean onartutako eta iaz bertan behera utzitako debekua martxan jarriko da, berriz ere, erabaki honekin.
Ulia mendiko itsaslabarrak. Atzealdean, Platako Farola eta Jaizkibel. 
Gipuzkoako Aldizkari Ofizialean astelehen honetan jendaurrean jarri denez, Donostia eta Pasaia artean dagoen Ulia mendia ehizarik gabeko eremu izatera pasako da datorren hilabetean. Foru agindu horri jarraiki, irailaren 1ean hastekoa den ehiza-denboraldi berrian ezingo da halako jardunik aurrera eraman zonalde horretan.
Eguzki, Ehiza eta Gune Naturalak taldeek, besteak beste, erabakiaren aldeko babesa erakutsi nahi izan dute: “Ulia, azkenean, tirorik gabeko gune segurua” izango baita. Gogorarazi nahi izan dute, halaber, Foru Aldundiak 2014ean debekatu zuela Ulian ehiza egitea eta iaz, epai judizial baten ondorioz, berriro eskaini zitzaiela ehiztariei baimen hori. Aldaketa hori “paragrafo akastun” baten ondorioz egin zen, eta behin hura zuzenduta berriro onartu zen, pasa den abenduan, mendia ehizarik gabeko eremu bezala izendatzen duen neurria.
