Ehundaka pertsona bildu dira Antxon "herritarren bakearen" alde
Antxoko Auzo Elkarteak deitutako bilkurari babesa erakutsi diote antxotarrek gaur. Azken asteetan herrian jazotako gertakarien aurrean irtenbideak eskatzeko, txalo eta eskari artean bete dute herritarrek Zumardia.
Ehundaka antxotar bildu dira Gure Zumardian. 
Pasai Antxoko Auzo Elkarteak atzo iragarri zuen gaur, osteguna, 20:00etan Gure Zumardia plazan bilduko zela taldea, antxotarrak herriko kaleetan barrena seguru ibil daitezen bermatzea eskatzeko. Herriak bat egin nahi izan du Elkartearen aldarrikapenarekin, eta ehundaka bizilagun bildu dira gaur herriko plazan. Txaloak eta deiadarrak ez dira falta izan, “Gora herria” bezalako oihuak nagusitu dira bilkuran.
Elkarteko kideek sorpresa agertu dute hainbeste herritarren agerpenaren aurrean, eta argi utzi nahi izan dute elkarretaratzearen helburua “Antxon azken asteetan egon den utzikeria salatzea” zela. Herritarren haserrearen eta segurtasun falta sentsazioaren aurrean zerbait egin beharra zegoela uste dute taldekideek: “Jendeak gogoa dauka egoerari aurrea hartzeko. Aldaketak behar dira”. Azken asteetan herriko ahulenei izandako lapurretak eta beldurrarazteak etetzea ezinbestekotzat dute.
Auzo Elkarteak eskerrak eman nahi izan dizkie antxotarrei erakutsitako babesagatik. Nahiz eta Udalak emandako aurrerapausoak eta alkateak kideei eskatutako bilera modu positiboan baloratu dituzten, lanean jarraituko dutela azpimarratu dute antxotarrak herrian lasai ibil daitezen lortu arte: “Hau gure herria da eta guk libre ibili nahi dugu”.
