Asteburuan, Kilometro Lezo gehiago
Kilometro Lezo kultur egitasmoaren barruko bi emanaldi jasoko ditu gaur eta bihar Herri Eskolako jolastoki estaliak. Antzerkia eta musika dira nagusi.
Trapu Zaharra taldekoak, 'Turistreatzen' obran. Kilometro Lezo kultur egitasmoaren hirugarren asteburua izango da honakoa. Gaur (ostirala, hilak 28) eta bihar Herri Eskolako jolastoki estalia antzerkiaren eta musikaren topaleku izango da. Bi emanaldiak 23:00etan dira.
Gaur, hasteko, antzerkia. Trapu Zaharra antzerki taldeak Turistreatzen lana eskainiko die fresko samar izateko antza duen gaualdian. Umorezko lana da.
Biharko, musika. Ghost Number taldeak country, swing, calypso edo Tom Waitsen doinu garratzak eramango ditu Lezoko eremu estalira. Estilo nahasketa aberatsa Kilometro Lezoren hirugarren astebururako.
Emanaldiak doan dira, baina aurrez gonbidapenak jaso behar dira Kultura sailaren bulegoan, edo Lezoko Udalaren webgunearen bitartez.
