Castrotik play-offa ekarri nahi du San Pedrok, eta ahal bada, banderaren bat
KAE1 Ligako azken bi estropadetan bigarren postuan sendotu nahi dute moreek, horrek ematen dielako igoera play-offeko txartela eskuratzeko aukera.
Joan den igandena, Getxoko banderarekin. Argazkia: Sanpedrotarra AE. KAE1 Ligako azken bi estropadak izango dira asteburuan Castron. San Pedrori dagokionez, helburu garbia du: ligan duen bigarren postua ziurtatu, Eusko Label Ligara igotzeko kanporaketa edo play-offean aritzeko. Lehen postuan Pedreña dago, ia ezinezkoa dute moreek hara iristea. Castroko biharko eta etziko estropadak 12:00etan dira.
San Pedrok aukera asko ditu gizonen arraunaren goren mailara iristeko eskubidea ematen duen kanporaketan izateko. Ondo iritsi da ligaren bukaerara. Horren erakusle da joan den asteburuan Getxon irabazi zuen bandera. Liga horretako lider Joseba Fernandezen Pedreña da, 11,60ko punturen batezbestekoarekin —puntuaketa sistema hau erabiltzen ari dira: lortutako puntu guztiak, egindako estropaden artean zatitzen dituzte koefiziente hori lortzeko—. Bigarren dira moreak, 10,70eko batezbestekoarekin, eta hirugarren nahiz laugarren Getaria (8,50) eta Deusto (8,40) dira.
Pedreñak patrikan du play-offean izateko aukera; bigarren postuak ere mailaz igotzeko borrokan egoteko aukera ematen du, eta esan daiteke, Castroko bi lehietan ezustekorik gertatzen ez bada, irailaren 19 eta 20an Libia mailaz igotzeko kanporaketan izango dela. Ligako estropadetan ia beti lehen hiruren artean izan dira, eta asteburuko lehietan ez dago arrazoirik hori horrela ez dela izango pentsatzeko. Hau da, patrikan du ia-ia San Pedrok play-offean izateko aukera. Noski, hori uretan berretsi egin behar du.
San Juanentzat tramitezko asteburua izango da Castrokoa. Erreka ontziak ez du goialdeko postuetara iristeko aukerarik, beraz, Kontxako sailkapen estropada prestatzeko edo ohikoak izan ez diren arraunlariei aukera emateko asteburua izan daiteke.
