Hibaika: Zumaiaren aurretik gelditu, eta amesten hasi
ETE Ligako azken bi estropadak izango ditu jokoan Hibaikak asteburuan. Play-offean egoteko bigarren postuaren bila doaz, Zumaiarekin borrokan.
Hibaikako arraunlariak. Argazkia: Hibaika AE. ETE Ligaren bukaera ikusgarria egiten ari da Hibaikaren emakumeen trainerua. Azken bost estropadetan beti izan dira hiru lehenen artean, tartean, hilaren 16ko I. Rosmi Bandera irabazi zutelarik. Horrek ETE Ligako sailkapeneko bigarren postura eraman ditu errenteriarrak, 64na punturekin hirugarren den Zumaiarekin berdinduta. Haiekin izango du aurrez aurreko lehia estua Hibaikak asteburuan Euskotren Ligarako play-offerako bigarren postua eskuratzeko. Asteburuko bi estropadak Castron dira, larunbat nahiz igande, biak 11:00etan. Itsaso zakarra espero da.
ETEn jokatu diren hamar estropadetan, seitan izan da Zumaiaren aurretik Hibaika. Azken hiruretan beti. Hortaz, puntutan berdinduta egon arren, Madalen ontzikoen azken estropadetako joerak azaltzen du zumaiarrak baino hobeto daudela ligaren bukaera honetan. Horrek, eta duten moralak, ziur Euskotren Ligara igotzeko kanporaketan (irailaren 19 eta 20an) izateko bigarren postua ematen diela. Izan ere, Tolosaldearentzat izango da ETEko lehen postu hori.
Hibaikak azken bi urteetan emakumeen trainerua berreraiki du. Lan handia egin dute harrobiarekin. Play-offera sailkatzea bultzada handia izango litzateke errenteriarren lan egiteko moduarentzat. Itsasoan erakutsi behar da orain ikasitako guztia.
