Tiñelun azken egunetan izan direnei PCR proba egin dezatela eskatu die alkateak
Bertako langile batek COVID-19agatik positibo eman duelako egin du deia Jesus Mari Martiarena alkateak. Hilaren 25etik itxita dago Tiñelu.
Jesus Mari Martiarena Lezoko alkateak jakinarazi duenez, Tiñelu elkarteak gaur bertan udalari jakinarazi dio bertako langile batek COVID-19agatik positibo eman duela PCR proban. Horregatik, alkateak bertan azken egunetan izan direnei eskatu die (abuztuaren 25etik itxita dago Tiñelu, prebentzio neurri gisara) dagokion osasun zentroarekin harremanetan jar daitezela PCR proba egiteko. Horrez gain, “oro har sintomak sumatzen dituztenei edo kutsatuta egon daitezkeela susmoa dutenei” proba hori egin dezatela eskatu die alkateak. Horiei, aldi berean, ingurukoekin kontaktua murrizteko eskatu die.
Jarraian, lezoarrei lagungarri izango zaizkien hainbat telefono zenbaki:
- Lezoko osasun zentroaren telefono zenbakia: 943 34 64 74.
- Iztietako osasun zentroaren telefono zenbakia: 943 00 79 40.
- Osasun Sailaren koronabirus kasuetarako informazio telefonoa: 900 20 30 50.
Martiarenak bereziki dei egin die ostalaritza establezimenduei segurtasun eta osasun neurriak betetzen jarrai dezatela, “elkar zaintzen jarraitu behar dugu, guztion hobe beharrez”. Lezoar gehienak neurri horiek zorrotz betetzen ari direla berretsi du alkateak, eta horrela jarrai dezatela eskatu die. Maskara erabiltzea, eskuak maiz garbitzea, eta segurtasun distantziak gordetzea giltzarri direla oroitarazi du. Gainera, bide publikoan ez erretzea bi metroko distantzi mantendu ezin denean, nahiz ahal den neurrian kontaktuak murriztea aholkatu du.
