Bideo eta mezu bidez arraunlariak animatzera deitu du Hibaikak
Mezuak, bideoak, argazkiak... denak balio du Hibaikako arraunlariak animatzeko eta eskaera hori egin du elkarteak normaltasun berrira egokitutako estropaden agertokian.
Mezuak, bideoak, argazkiak… denak balio du Hibaikako arraunlariak animatzeko eta eskaera hori egin du elkarteak normaltasun berrira egokitutako estropaden agertokian. Ezin dituzte arraunlariak bertatik bertara animatu zaleek, baina indarra, babesa eta animoak helarazteko beste bidea zabaldu du Hibaika Arraun Elkarteak. Posta elektronikoa jarri du zale guztien eskura, eta bertara, argazkiak, bideoak eta mezuak helaraztea eskatu die.
Emakume eta gizonen traineruak arraunaren olinpiada den Kontxako Banderaren sailkapenerako estropadetan arituko dira bihar eta etzi. Onena emango dute bi tripulazioek. Zuzenean ez, baina zaleek ere ziur ez dutela hutsik egingo herriko arraunlariak animatzeko garaian, bertatik bertara ez bada ere.
Sailkapen estropada, bi egunetan banatu dute COVID-19aren eraginez. Bihar emakumeen sailkapen estropada egingo dute 15 ontzirekin (17:30), eta 3an gizonena 24 trainerurekin (17:30).
